دي رسالة للسيدات و السادة المهندسين من مهندس دفعة 2006 ناوي يرشح نفسه لمقعد نقيب مهندسين مصر في انتخابات 2022 إن شاء الله
كلنا لاحظنا انتخابات النقابة اليومين دول تقريبا 3% حضروا، ضعف الإقبال ده مش سببه المناخ السياسي زي ما البعض بيقول، ولكن سببه إن احنا اتبرمجنا انتخابيا كمهندسين نهتم بالنوادي و العلاج و الرحلات و الإسكان، بينما المهندس نفسه وظيفيا ومهنيا و بالتالي ماليا وصحيا محدش مهتم بيه
بالتوازي مع الاهتمام بالمهندس يجي الاهتمام بالنقابة وتحديدا حوكمة عمل النقابة بشكل شفاف يتيح إشراك المهندسين في أنشطة النقابة قبل و بعد الانتخابات مش بس وقت الانتخابات
فيه مواقع وشركات توظيف كل اللي وفرته بعد سنين شغل هو مائة وخمسين ألف وظيفة وماشاء الله ليهم فروع وكول سنتر وبيكسبوا، وممكن أصحابها مهندسين، بينما نقابة المهندسين داخلة على مليون عضو ومش مستفيدة لا من نجاحات أعضاءها و لا من قواعد بياناتها، والضحية هو المهندس اللي مش لاقي شغل لائق من غير واسطة، واللي مش لاقي معاش مناسب من غير كسر ودائع
النقابة مهتمة بمشروعات مش بتفيد الغالبية العظمة من المهندسين، زي الإسكان بيستفيد منه غالبا مهندس في وظيفة جدا أو لديه ملاءة مالية عالية، بينما المهندسين اللي فقدوا وظائفهم لأي سبب طاريء من مصر أو الخارج، أو حتى قل دخلهم بعد التعويم - هؤلاء المهندسين النقابة متجاهلاهم - أو بمعنى أدق منظومة عمل النقابة متجاهلاهم (ومش بقول إني ضد مشروعات الإسكان بس بقول ترتيب الأولويات و التوازن مهم و مطلوب)
أنا ومهندسين غيري كتير الحمد لله بفضل الله اتخرجنا و اشتغلنا و اتجوزنا و سكنا وخلفنا و غيرنا كارير و عملنا شركات، والنقابة دورها كان غايب في كل المراحل دي عن معظم المهندسين رغم إنها كان ممكن تفيد وتساعد جدا
واللي يدخل موقع النقابة يشوف شروط مصاريف الولادة ح يعرف يعني ايه الاهتمام مبينطلبش فعلا - اللي هو لازم بعد الولادة تدفع اشتراك المولود لسنة، وتضيف الزوج و الزوجة في حالة عدم الاشتراك (اشتراك في ايه مش فاهم ما علينا)، وبعد ما تعمل كووول ده ساعتها النقابة تعمل لك خطاب تحويل! طب لو الزوجة اللي بتولد هي المهندسة؟ لا والله موقع النقابة مش متابع
مهندسين كتير بيتخرجوا تايهين مش عارفين يشتغلوا في ايه و يلاقوا وظيفة ازاي، والكل محتاج مساعدة في التدريب بينما النقابة حتى مش مستفيدة من السوشيال ميديا في توصيل التدريب مجانا للناس، ولا بتشجع المهندسين إنهم يتطوعوا لمساعدة زملاءهم
المادة الثانية من قانون النقابة أول بند فيها الارتقاء بالمستوى العلمي و المهني للمهندسين وبعدين رعاية الأسرة في البند التالت، والبند الأخير خالص أو القبل الأخير بيتكلم عن الإسكان، ليه؟
عشان اللي كتبوا القانون عارفين كويس إن لما المهندس بيدور على شغل أو يعمل مشروع ويلاقي نقابة تساعده فنيا و استشاريا و تسويقيا وتخطيطيا، حتى مش بقول ماليا، ح ينجح و ح يعرف يلاقي وظيفة، أو يكمل المشروع كويس، يا يعيد النظر و يغير اتجاهه وبالتالي حياته تستقر و مش ح يحتاج يتعالج أصلا
النقطة قبل الأخيرة: لما سلطات الدولة التلاتة تشوف المهندسين أقل الفئات مشاكل وأكثرها إيجابية وكمان أكثر فئة مثلا منتظمة في سداد ضريبة الدخل - هل لما النقابة تحب تعدل في قانون النقابة أو تطلب زيادة نسبة إيرادتها من رسوم إنتاج الحديد أو الأسمنت لتوجيهها لبرامج تأهيل و مساعدة المهندسين وظيفيا شيوخا و شبابا حد ح يعترض؟
آه الشركات و غيرها ح يعترضوا طبيعي بس لما النقيب يتفاوض معاهم و يشوفوا برامج التأهيل و نتائجها الإيجابية اللي بتوفر للشركات دي فلوس و وقت و جهد مؤكدا ح نوصل لحلول وسط ترضي جميع الأطراف
ولحسن الحظ أنّ القيادة السياسية الحالية واضح جدا إدراكها لأهمية و دور المهندسين كما يظهر أمام الجميع في الافتتاحات الرسمية بين الرئيس السيسي و اللواء كامل رئيس الهيئة الهندسية في القوات المسلحة
خالص أمنياتي بالتوفيق لكلا المرشحين يوم الجمعة و نتطلع للمزيد ممن سيحالفه الحظ سواء سيادة المهندس مصطفى أبو زيد أو النقيب الحالي سيادة المهندس طارق النبراوي أو معالي المهندس هاني ضاحي، وأخيرا رسالتي للمهندسين:
من حقكم نقابة تساعدكم من أولى كلية لغاية آخر العمر
و من حقكم نقابة تقدم لكم مساعدات غير مالية بأنواعها سواء بمقابل أو تطوعيا من زملاء مختارين
وكمان من حقكم نقابة تقدم لكم مساعدات مالية كحق مكتسب لكم لما تلجأوا لها
وعشان كده معادنا انتخابات 2022 والتفاصيل سيتم نشرها تباعا على الصفحة:
ومن دلوقتي حتى التاريخ ده أي حد بيدور على شغل أو محتاج مساعدة وظيفية يا ريت يراسلنا على الصفحة و سيتم التواصل المباشر معاه خلال أسبوعين بالكتير
No comments:
Post a Comment