فيه ناس كتير بتفتكر إن الحل صعب لما بنتكلم عن الدفاع والصناعات الدفاعية.. لكن أنا بقول هات مهندس ايده نضيفه.. واديله ارض وصلاحيات فقط.. وشوف بعد 5 سنين هيعمل ايه.. وانا بأكد لك هيوصل لقدرات في التصنيع والتطوير أعلى من اللي وصل لها شركات حكومية عندنا في عشرات السنين..
فيه مهندس برازيلي اسمه جواو فيردي.. أسس زمان شركة Avibras هو وكام واحد صاحبه كانوا زملاء دراسة.. وقت ما أسس الشركة كانت البرازيل مش عندها قاعدة صناعية دفاعية ضخمة ولا قوية.. وعشان كده فهم إنه صعب ينافس الكبار في المجال..
قالك انا مش هعمل مقاتلة ولا تكنولوجيا متطورة.. أنا هشتغل على وقود الصواريخ الصلب، والصواريخ التكتيكية، وراجمات الصواريخ..
في البداية اشتغلوا على حاجات محدودة.. جسم الصاروخ، الوقود الصلب، أنظمة إطلاق بسيطة، وتجارب مع الجيش البرازيلي.. والتطوير استمر وتراكم الخبرة والمعرفة كان مهم في الفترة دي..
بعدها الشركة طلعت بمنظومة اسمها ASTROS II.. ودي دي منظومة راجمة صواريخ كاملة.. عربات إطلاق، عربات قيادة وسيطرة، عربات إعادة تذخير، رادار وتحكم نيراني، محطة أرصاد..
منظومة ASTROS II كانت ذكية جداً من ناحية التصميم.. نفس منصة الإطلاق تقدر تضرب صواريخ بأعيرة ومديات مختلفة..
العراق اشتروا أعداد كبيرة منها في الثمانينيات.. والسعودية اشترت، وقطر والبحرين وماليزيا وإندونيسيا وغيرهم دخلوا ضمن المشغلين أو المشترين. فيه تقديرات بتقول إن العراق اشترى حوالي 66 منظومة ASTROS II، وإن السعودية اشترت حوالي 60 منظومة. وحتى لو الأرقام الدقيقة تختلف من مصدر للتاني، الثابت إن المنتج البرازيلي خرج من السوق المحلي وبقى سلاح تصديري حقيقي..
هتقولي ده كان زمان أيام الزمن الجميل.. هقولك طيب يمشي معاك تبص بصه على Agris Kipurs من لاتفيا.. دولة صغيرة وامكانيات بسيطة وعدد سكانها 2 مليون فقط.. عمل فيها شركة Origin Robotics سنة 2022 بأول جولة تمويلية 4 مليون دولار.. رقم صغير جدا بالنسبة للصناعة دي.. اشتغلوا على انظمة التوجيه والمسيرات.. وفي 2026 يعني من كام شهر فقط بقى بيصدر نظام مهم لاعتراض المسيرات اسمه BLAZE لدول الناتو..
الموضوع محتاج فتح المجال للقطاع الخاص.. حوكمة ورقابة بدون بيروقراطية وتأخير .. وسيب الشباب تشتغل وتشيل الشيلة واستلم منهم منتجات..
أعلاه منقول بتصرف يسير من مؤمن أشرف:
ليست هناك تعليقات:
إرسال تعليق