مرة كنت مشارك مقاول فى بناء عمارة 11 دور وطبعا كان اشتراطى عليه إن انا المسؤل عن تنفيذ الاساسات والخرسانات
وفعلا نفذتها زى مابيقول الكتاب عملت جسات و خوازيق عاملة وخوازيق ساندة والتصميم الانشائي كان اللى عامله دكتور مهندس صديق وانا اللى كنت بأستلم الحديد وبتابع التنفيذ وكله تمام وبعد ماخلصنا الخرسانات كلها وشغالين فى المبانى المقاول شريكى ده جاب قطعة أرض تانية وعرضها عليا كمشاركة اعتذرت له لأنها كانت فى منطقة مش قد كده المهم بعد مدة لقيته بيطلب منى اروح استلم حديد اللبشة فى عمارته الجديدة وعرفت منه انه شارك حد تانى وفعلا رحت معاه لقيته مخلص حديد اللبشة ومش عامل خوازيق وطبعا مش شرط طالما تقرير الجسات مطلبش خوزايق فطلبت منه تقرير الجسات عشان أقرأ التوصيات طلع مش عامل جسات ولما عاتبته وفهمته ان ده غلط وطى كبش بإيده شوية تراب وقالى ماهى تربة حلوة أهى ياباشمهندس هى بس فلوس على الفاضى وبعدين انت كلفتنا خوازيق فى العمارة التانية مكنش ليها لازمة
قلت له عموما انا بأنصحك وانت حر طب فين لوحة تسليح اللبشة
قالى مفيش لوحة انا عامل نفس تسليح العمارة اللى فاتت بس وفرت الاضافى ملهوش لازمة
قلت له اومال جايبنى ليه
قالى عشان الحدادين يعرفوا انه فيه استشاري وبردوا أخد رأيك
قلت له يانهار ابيض انت كده حتلبسنى المسؤلية
قالى متقلقش ياباشمهندس انا مش اول مرة ابنى عمارة وكل العمارات اللى بنيتها واقفين زى الفل
قلت له ياعم مقلقش إيه بس الموضوع مش بالفهلوة وفيه أصول لازم تتعمل
قالى انت بس اللى محبكها ياباشمهندس زيادة عن اللزوم والموضوع ابسط من كده بكتير
قلت له انت ناوى تطلع كام دور
قالى ان شاء الله 16 دور
ياحاج اللبشة دى كانت متصممة ل11 دور بس وبعدين توزيع العمدان مختلف والاحمال مختلفة ونوع التربة كمان مختلف يعنى مينفعش تاخد تسليح عمارة لعمارة تانية
قالى ماكلها عمارات ياباشمهندس
قلت له وبعدين انت ليه معلى حديد اللبشة عن الرصيف كده
قالى حبيت أوفر فى الحفر
قلت له اللبشة حتبقى عالية عن الرصيف بتاع 70 سم وده غلط وحتضطر تعمل سلم لمدخل العمارة على الرصيف بره العمارة والرصيف أصلا ضيق وبعدين صرف العمارة الرئيسى حيبقى عالى عن الرصيف بتاع متر وسألته فين تهبيط بير الاسانسير فى اللبشة
قالى آه فعلا أهى دى اللى معملتش ليها حسابى
قلت له دى بس
ومشيت وبقيت أقابله فى العمارة اللى مشاركه فيها
ولقيته جالى بعد كام شهر وشه احمر ومش طبيعى وكنا لسه بنشطب العمارة الاولى
قالى إلحقنى ياباش مهندس
قلت له خير
قالى العمارة مالت 20 سم ياريت تيجى تشوف حل ياباشمهندس
روحت معاه كان وصل للدور التامن خرسانات
نزلت خيط بتقل (شاغول) من على الواجهة لقيت فعلا فيه ميل حوالى 22 سم ناحية الشارع
وطبعا مكنش وقته عشان ابستفه
بس نصحته بحلول يعملها عشان على الاقل الميل يثبت وميزيدش
وكويس انه كان عامل لبشة مش قواعد منفصلة
https://www.facebook.com/share/19aXMtZwpx/
ليست هناك تعليقات:
إرسال تعليق