الثلاثاء، مايو 21، 2019

الرد على شائعتي رفض قانون شيرين فراج لنقابة المهندسين

تحديث 7 مارس 2026: لن أنتخب م. هاني ضاحي بسبب كوارثه في تعديل قانون النقابة 2018 ثم مجلس الشيوخ مايو 2021

لن أنتخب م. هاني ضاحي لأن قانونه ح يدفّعنا متوسط 12,333ج كل سنة رسوم تجديد اشتراك النقابة إجباري!!!!
يرجى الضغط على الصورة لتكبيرها



الرد على شائعة أن مشروع لقانون د.شيرين فراج رفضته الجمعية العمومية في 6 مارس 2019:
اللي حصل إن أحد السادة أعضاء مجلس النواب من المهندسين (د.م. محمد عبد الغني) طلع على منصة مسرح النقابة يوميها وقال أنا برفض القانون وناس سقفت وشكرا على كده لا حصل تصويت ولا حاجة

وحتى لو افترضنا نظريا حصول تصويت بالرفض فهو غير ملزم لا قانونا (قانون نقابة المهندسين الحالي لا يلزم النقيب أساسا بعرض القانون علينا أو حتى على المجلس الأعلى) ولا دستورا لأن مجلس النواب سلطة تشريعية مستقلة أساسا وبالتالي لن يوقف هذا الرفض المزعوم في الجمعية العمومية تمرير القانون في مجلس النواب


الرد على شائعة أن مجلس النواب رفض مناقشة مشروع الدكتورة شيرين فرّاج:
 
لجنة الإسكان في مجلس النواب صحيح رفضت مناقشة المشروع في العاشر من مارس (بحضور السيد النائب د.م.محمد عبد الغني وزميله النائب وعضو مجلس النقابة م.إيهاب منصور نقيب الجيزة) لكن اللجنة قررت في اليوم التالي الحادي عشر من مارس مناقشة قانون د.شيرين فرّاج ولـــكـــن بعد ورود رؤية ومقترحات نقابة المهندسين بحيث يكون القانونين قدام اللجنة سوا:
https://www.mobtada.com/details/821916

أي أن الجواب النهائي -على رأي جورج قرداحي :) - هو  أن اللجنة لم ترفض مناقشة مشروع قانون د.شيرين فرّاج فليه يا ترى يا هل ترى بعض أعضاء مجلس نقابة المهندسين (وفيهم أعضاء مجلس نواب بالمناسبة) مهتمين يروّجوا لنصف الحقيقة الملغي دون النصف الآخر الساري لمصلحة مافيا المقاولات اللي ورا القانون ؟!!


وهنا لنك تحميل القانون من الصفحة الرسمية لنقابة بورسعيد الفرعية (مفيهوش حتى مادة حق الجمع بين معاش النقابة وأي معاش آخر):




احنا ضد قانون جباية النقابة الكارثي في مجلس النواب واللي بيحرم نصنا من المعاش والنص التاني تجديد اشتراكهم السنوي لو شغالين في القطاع الخاص ح يتراوح من 2500ج لحديثي التخرج إلى 12ألف جنيه للي خبرة 15 سنة وهكذا:
https://engineersegypt.blogspot.com/2019/05/parliament-new-engineering-law-faqs.html 

ليست هناك تعليقات:

السبت، مايو 18، 2019

هاشتاج اقفلوا دكاكين هندسة: ماذا بعد صرخات المهندسين الغلابة؟

أطلق المهندسون الغلابة في مصر هاشتاج #اقفلوا_دكاكين_هندسة احتجاجا على غياب الوظائف المناسبة و الأجور العادلة، لدرجة أن وزير التعليم العالي نشر فيديو تعليقا على الهاشتاج وسبقه نقيب المهندسين ووزير النقل الأسبق هاني ضاحي في مداخلة هاتفية مع خلود زهران بعد وصول الهاشتاج إلى تريند على موقع التواصل الاجتماعي الشهير تويتر وازدياد أعضاء جروب اتحاد مهندسي مصر (خريجي حكومي) المطلق للهاشتاج من ألفي مهندس في مارس إلى أكثر من خمسين ألف مهندس مع انتشار الهاشتاج أواخر إبريل وصولا إلى نحو مائة ألف مهندس قرب نهاية شهر مايو

مثل أي ثورة في التاريخ، فإن وقودها هم الغلابة ولكن المستفيدين منها هم آخرون ولكنهم ليسوا انتهازيين
وعشان كده هاشتاج اقفلوا دكاكين هندسة مستفدش منه المهندسين ولا خريجي حكومي وإنما استفاد منه:


1- أعضاء الأحزاب السياسية (حزب العيش والحرية مثلا) والحركات النقابية (رابطة بناء شباب المهندسين مثلا):


المهندس سعيد أبو طالب أحد مؤسسي حزب العيش والحرية و أحد مؤسسي حركة بناء رابطة شباب المهندسين

مثلا: حين نشر أحد أعضاء الجروب بوستا يطلب كتابة مذكرة لإرسالها للنائب عن دائرته أحمد الطنطاوي رد عليه السيد المهندس سعيد أبو طالب أحد مؤسسي حزب العيش والحرية و أحد مؤسسي حركة بناء رابطة شباب المهندسين إن ده اتجاه كويس لكن الأفضل منه تقديم المذكرة إلى أسماء نواب آخرين ذكرهم سيادته بالاسم م.هيثم الحريري، د.محمد عبد الغني، د.شيرين فراج - رغم أنّ الأخيرين وراء قانون جباية نقابة المهندسين الكارثي في مجلس النواب والحريري عضو نفس تيار الأول استقلال المهندسين وكلهم ملتزمون للصمت إزاء هذا القانون الكارثي وواضح جدا مش من مصلحتهم إثارة أي موضوع يتعلق بالمهندسين تحت قبة البرلمان لحين تمرير قانون جباية النقابة الكارثي:

بل إن بعض أعضاء ومؤسسي حركة بناء رابطة شباب المهندسين كانوا أعضاء في نفس لجنة القانون الكارثي لدرجة أن الباشمهندس سعيد أبو طالب نفسه لم ينطق بحرف واحد ضد قانون جباية نقابة المهندسين الكارثي في مجلس النواب مثله المؤسسين م.نادر شمس أمين صندوق نقابة القاهرة الفرعية و د.محمد حسن سليمان عضو المجلس الأعلى للنقابة.

علما بأن إحدى مؤسسات الحركة السيدة الفاضلة م.إيمان علام تعمل كمدير عام بوزارة الإسكان والتي ينقل إليها القانون الجديد مهمة الإشراف على نقابة المهندسين 


2- بعض موظفي الاتش آر المسؤولين عن توظيف المهندسين:
تحوّل جروب اتحاد مهندسي مصر (خريجي حكومي) إلى دليل واضح و مستند صريح لإدانة بعض مشتركيه من خريجي كليات الهندسة الحكومية متيحا الفرصة أمام بعض ضعاف النفوس من بعض موظفي الموارد البشرية كي يستخدموه كحجة في عدم توظيف خريجي كليات الهندسة الحكومية، إذ لا يدرك هؤلاء الموظفون نن هاشتاج #اقفلوا_دكاكين_هندسة يمثل فعلا شريحة الخريجين الغلابة من الجامعات الحكومية وهم أشد المتضررين من غياب العدالة الاجتماعية في فرص التوظيف وأرقام الرواتب

إن الجروب ورغم حسن نوايا مؤسسيه وأعضاءه قولا واحدا إلا أنه أساء إلى بعض المشتركين فيه حيث أثبت عنهم الآتي:

1- معدل ذكاءهم أقل من المتوسط:
رغم أن أبسط أبجديات المنطق وبديهيات الحياة أن يرتب الإنسان طلباته من الآخرين بحيث تكون معقولة وقابلة للتنفيذ، إلا أن بعض مشتركي الجروب كانت طلباتهم خارج نطاق الخدمة.

فالبعض طالب بغلق المعاهد الخاصة بالكامل و طرد خريجيها من نقابة المهندسين أو إلحاقهم بدرجة أقل من مهندس رغم أن هذا مستحيل عمليا و باطل قانونيا، خصوصا وأن المعاهد الخاصة تستوعب 20% من التعليم العالي في مصر طبقا للوزارة في 2018:

والبعض طالب بفرض كوتة أو سقف محدد لعدد خريجي هذه المعاهد لا يتم تجاوزه كل سنة بحال من الأحوال، دون إجراء دراسة متخصصة ودون حتى طلب الاستعانة بالخبراء والمسؤولين للوصول إلى هذا الرقم لبدء التطبيق - متجاهلين وجود نسبة ليست بالقليلة من خريجي كليات الهندسة لا يمارسون عملا هندسيا بالأساس والقائمة تطول وتشمل الناقد الكروي أحمد عفيفي و المطرب المعروف هشام عباس وغيرهما من التجار والإعلاميين والسياسيين والإداريين والمصورين والمدرسين والمدربين.


2- يفتقرون إلى الحلول الإبداعية للمشكلات التي تواجههم:
امتلأ الجروب بتعليقات مطولة مملوءة بعبارات الهاشتاج رغم أن الهاشتاج لا يظهر في نتائج البحث أو يؤثر في التريند إلا إذا كان على تويتر أو في نصّ البوست العام وليس في التعليقات عليه، وهو ما أدى إلى تقليل التفاعل مع الجروب فمين اللي فاضي يفرّ في عشرويت تعليق مكررين عشان يقرأ التعليقات المفيدة!

وبدلا من ترتيب خطوات عملية على الأرض ولو في التواصل مع أساتذة كليات الهندسة مثلا أو جمع توقيعات جمعية عمومية غير عادية للتصويت على قرارات تلزم النقابة بتنفيذها لو وافق عليها الحضور بموجب المادة 28 الفقرة 3 من قانون النقابة، إذا بالجروب وأعضاءه يكتفون بنشر الهاشتاج بين وقت وآخر دون هدف محدد ودون بناء على انتشاره إذ الدنيا كلها قائمة على استثمار انتشار هاشتاج ما في دولة ما من أجل تحرك عملي ما يستغل الزخم الإعلامي و التفاعل الشعبي.

3- لا يقرأون! لا الدستور ولا قانون نقابة المهندسين رقم 66 لسنة 1974:
يهدف الجروب طبقا لما هو معلن في خانة معلوماته الظاهرة للكافة إلى إنشاء جمعية مهندسين مستقلة عن النقابة الحالية وإلى سحب الثقة منها!

والحقيقة أن قانون نقابة المهندسين يخلو من جملة سحب الثقة، كما أن المادة 77 من الدستور واضحة صريحة "لا تنشأ لتنظيم المهنة سوى نقابة واحدة" وتؤكدها المادة الأولى من قانون نقابة المهندسين "تعتبر الهيئة الممثلة للمهندسين المتمتعين بجنسية جمهورية مصر العربية":
https://ar.wikisource.org/wiki/%D9%82%D8%A7%D9%86%D9%88%D9%86_%D9%86%D9%82%D8%A7%D8%A8%D8%A9_%D8%A7%D9%84%D9%85%D9%87%D9%86%D8%AF%D8%B3%D9%8A%D9%86_%D8%A7%D9%84%D9%85%D8%B5%D8%B1%D9%8A%D8%A9


4- لا يجيدون مهارات الكتابة والتواصل:
لم ينشر الجروب صيغة بيان أو خطاب يمكن إرساله إلى الصحفيين أو وسائل الإعلام، وحتى ما نشر عليه من اجتهادات فردية كان خطابات طويلة تخلو من أي طلب واضح بآليات محددة وإنما مجرد كلمات عمومية فضفاضة.

مثلا أحد الخطابات المتداولة موجها لرئيس الجمهورية يتحدث عن أن الضغط الأكاديمي على طلبة الكليات/المعاهد الخاصة لا يمثل سوى 10% (شوف الدقة) منه على طلاب الجامعات الحكومية وبناء عليه اقفل الخاص يا ريس! وده بدلا من مطالبته -مثلا- بأن يأمر وزير الري المشرف على النقابة كي يوجهها لتوفير خدمات لحديثي التخرج والباحثين عن وظيفة بدلا من تحولها إلى نقابة رحلات وعمرات ونوادي واحتفالات!


5- يفتقرون إلى مهارات القيادة Leadership Skills
لا يوجد في الجروب قائد أو زعيم ذو أجندة واضحة بحيث يشكل الرأي العام ويستغل الزخم الإعلامي والتفاعل الشعبي كي يحقق أهدافه، وبالتالي أصبح الجروب سمك لبن تمر هندي بل امتلأ إما ببوستات ضد الدستور وضد القانون وإما ببوستات سخرية واستهزاء لدرجة أن الهجوم طال أسماء أساتذة جامعيين في كليات الهندسة!

وبالتالي خسر الجروب والهاشتاج ليس فقط خريجي الخاص وإنما حتى أساتذة كليات الهندسة أنفسهم ولذا لم يخرج اجتماع مؤسسي الجروب مع نقيب المهندسين بنتيجة واحدة ملموسة لأنهم لا يستندون -عمليا على أرض الواقع- إلى تأثير ملموس أكثر من مجرد كونهم جروب فيسبوك مليان إما رسومات كوميك وإما كلام منفلت ولذا كان طبيعيا أن يعلن أحد المؤسسين أن الاجتماع "كان تأثيره سلبي جدا" وأن "كل مطالبنا حتى مش هيتبص فيها أساسا":



3- نقابة المهندسين:
كان نقيب المهندسين هاني ضاحي يخشى الإعلان عن تفاصيل قانون جباية النقابة الكارثي في مجلس النواب لدرجة أنه في لقاء عام بمهندسي أسيوط في 19 إبريل قال علنا أنه لن يفصح عن مواد القانون الجديد و سيفرض سياسة الأمر الواقع عشان مش عايز زوابع:


أما بعد انتشار هاشتاج #اقفلوا_دكاكين_هندسة فإن معاليه شرب بيريل وخرج على الهواء مباشرة مع خلود زهران ليعلن بملء الفم بعض كوارث قانون جباية النقابة الجديد في صورة حلول لمشكلة تؤرق المهندسين:

1) الكارثة الأولى في قانون جباية النقابة الجديد بمجلس النواب:
إنشاء أكاديمية كورسات تدريب تابعة لكل نقابة فرعية لإجراء كورسات واختبارات إجبارية لخريجي الحكومي والخاص برسوم ملهاش حد أقصى بقوة القانون الجديد (المادتان 49 و 57) :(

ومش بس كده وإنما كمان النقابة من حقها تجبرنا على كورسات فيها كي نجدد شهادة مزاولة المهنة كل سنة (المادة 73) وطبعا ح ندفع للنقابة غصبا عننا لأن القانون الجديد يحظر شغلنا بدونها - يعني يا ندفع دم قلبنا عشان نجدد ونشتغل يا إما نتبهدل ويمكن كمان مهددين بالحبس باعتبارنا محظورين على آخر الزمن :( !

2) الكارثة الثانية في قانون جباية النقابة الجديد بمجلس النواب:
إجبار مهندسي القطاع الخاص (سواء خريج حكومة أو خاص) على التجديد السنوي لاختراع جديد اسمه كارنيه وشهادة مزاولة مهنة والقانون حدد مصدر مستندات التجديد هو صاحب العمل (الوحيد اللي يقدر يثبت إنك كمهندس بتمارس عمل هندسي المادتان 71 و 72)! يعني النقابة بدل ما تحمينا من صاحب العمل قررت تحطنا تحت ضرسه عشان نعرف نشتغل :(

وطبعا اللي مش ح يعرف يثبت ممارسة المهنة ح يكون بين نارين إما يدفع دم قلبه في كورسات أكاديمية النقابة، وإما يتحول لجدول غير المشتغلين فيكون محروما من المعاش ومن حق الترشح في الانتخابات وكل تفاصيل قانون جباية النقابة الكارثي هنا:

بل إن من يشاهد الفيديو الكامل لمداخلة معالي النقيب سيلاحظ استشهاده مرتين بكلام رئيس الجمهورية في عيد العمال عن زيادة أعداد خريجي حقوق عن سوق العمل، باعتبار قانون الجباية الكارثي الجديد في مجلس النواب لا يحل فقط مشاكل المهندسين وإنما أيضا يتماشى مع سياسة الدولة - في محاولة مكشوفة طبعا من النقابة لتمرير قانون جبايتها الكارثي وسط الزحمة:




4- المعاهد الهندسية الخاصّة:
ليس سرّا أن ترفع المعاهد الهندسية وكليات الهندسة الخاصة أسعارها بدء من العام الدراسي القادم بعد إعلان وقف الترخيص لمعاهد هندسية جديدة لمدة خمس سنوات، وهو ما سيزيد الطلب على المعاهد المرخصة بالفعل ويعطيها الفرصة لزيادة أسعار الدراسة فيها

هذه الزيادة في الأسعار لن تؤدي لانخفاض أعداد الخريجين ليس فقط لإن الإقبال على دراسة الهندسة مرتفع أصلا، وإنما لأن المعاهد الهندسية و كليات الهندسة الخاصة يهمها زيادة أرباحها وملء فصولها

اللي ح يحصل هو إجبار من كان يمكنه اليوم الالتحاق بالجامعة الألمانية في القاهرة قبل رفع الأسعار المنتظر إلى الالتحاق بمعهد خاص ستكون أسعاره مقاربة لسعر الجامعة الألمانية قبل الزيادة، وهكذا

الإيجابية الوحيدة هي أن المعاهد الهندسية و كليات الهندسة الخاصة التي تشوب العملية التعليمية بها ملاحظات سيكون بإمكانها تلافي هذه الملاحظات ورفع مستوى الجودة عبر الاستفادة من الزيادة المتراكمة جراء رفع الأسعار.



5- بعض أعضاء مجالس النقابة العامة والنقابات الفرعية والشعب:
ليس سرّا أن بعض الأعضاء الحاليين المنتخبين في مجالس النقابة العامة والنقابات الفرعية والشعب أبدوا آراءهم أو أصدروا بيانات تعليقا على هاشتاج اقفلوا دكاكين هندسة، وبغض النظر عن الاتفاق أو الاختلاف مع آراءهم فإن بيان رؤساء لجان الشباب الثمانية أيد مطالب خريجي حكومي ليس فقط دون تصويب لأخطاء الجروب في تقسيم المهندسين وتفرقتهم، ولكن الأخطر دون إدراك لنصوص قانون النقابة - فإن كانوا يدرون وعايزين يقرطسوا المهندسين لأغراض انتخابية فتلك مصيبة وإن كانوا لا يدرون فالمصيبة أعظم

وردي على بيانهم أعلاه الذي نشرته الصفحة الرسمية للنقابة الفرعية في المنيا موقعا من عشرة استثنيت منهم السيدة الوحيدة معهم وآخر توفيت والدته رحمها الله قبيل نشر البيان في الخامس من مايو 2019 لأوجه إلى الثمانية الباقين التعليق التالي:

1- والله والله والله أنا مشفتش زي بيانكم ده! بقى يا راجل لسة ح تتواصلوا مع معالي النقيب عشان تحددوا لقاء عاجل! ده انتم يا  مش عارفين تنشروا بيانكم ده على صفحة النقابة العامة للمهندسين أو حتى على صفحات النقابات الفرعية اللي حضراتكم أعضاء فيها وملقيتوش غير نقابة المنيا تنشر لكم البيان (تحديث: تم حذف البيان من على الصفحة الرسمية لنقابة المنيا بعد ساعات من نشر هذا الردّ على صفحة ثورة نقابة المهندسين :) )


2-  نقابتنا ليها سلطة على المعاهد الخاصة
ووزارة التعليم العالي ملهاش سلطة مطلقة
بدليل نصّ المادة 1 من النظام الداخلي الحالي في النقابة اللي حضراتكم بتزعموا إنكم أعضاء منتخبين في مجالسها
لو طبقتوا السطر الوحيد ده فالمعاهد الخاصة ح تمشي ع العجين متلخبطوش:
https://www.facebook.com/EngineersEgypt/photos/a.128909374504493/283711439024285/?type=3&theater

ليه؟
لما تلاقي إن خريجيها مش قادرين يجتازوا امتحانات القبول في النقابة (امتحانات قبول محددة التكلفة هاه مش اللي اللي حضراتكم طابخينه في القانون إن الخاص والحكومي كلهم تحت رحمة اختبارات كل سنة رسومها بلا حد أقصى  (أكرر: القانون الجديد احنا تحت رحمته اختبارات كل سنة حتى لو خبرة عشر سنين))



3- الجمعية العمومية غير العادية يا حلوين بتتعمل بجمع 100 توقيع بموجب المادة 15 وليس بتقديم مذكرة للنقيب يا يوافق عليها يا يرفضها ولو وافق ممكن يحدد جدولها بمزاجه -وبعدين ليه تستبقوا الأحداث بخصوص الجمعية العمومية غير العادية إنها تشكل لجنة؟

ليه مثلا متلزمش النقيب يبعت لمجلس النواب يضيف مادة في القانون تجعل النقابة والمجلس الأعلى للجامعات شريكين في تحديد نسبة القبول في كليات هندسة؟

والله والله والله لولا إني واثق في أمانتكم وإخلاصكم وصدقكم لكنت قلت إنكم قابضين من المعاهد الخاصة عشان تكذبوا ع المهندسين بإن النقابة ملهاش سلطة من أي نوع وإن السلطة الوحيدة والمطلقة فقط لوزارة التعليم العالي


4- ايه قلة الحيلة في النقطة 4 إنكم يا تقابلوا أعضاء مجلس النواب يا تقدموا طلبات إحاطة لوزير التعليم العالي - ليه مكسوفين تقولوا إنكم مشفتوش النسخة النهائية اللي في مجلس النواب وعشان كده كتبتم في الفقرة "أو تقديم طلبات إحاطة بالمجلس لوزير التعليم العالي"

أنا والله زعلان عليكم إنكم مش قادرين حتى تنشروا نصوص تعديلات القانون على حتى بروفايلاتكم الشخصية لعموم المهندسين يشوفوا ايه اللي نقابتنا بتعمله فينا (وهنا سؤال كبير طب ازاي حضراتكم بتمثلونا ده قانون يحدد مستقبلنا كلنا!)



5- النظام الداخلي بيصدره بموجب القانون الوزير المختص -وليس المهندسين الشباب الغلابة- ثم يتم التصويت عليه في الجمعية العمومية مجرد تصويت يا آه يا لأ يعني ملهمش دور في صياغته (وده منطقي فالنقابة مش ناشرة القانون الجديد في مجلس النواب ع المهندسين معقولة تشركهم في صياغة لائحته التنفيذية؟!)


6- بتلوموا المهندسين إنهم مبتعدين عن النقابة بينما لو حد فيكم جرب يبعت ايميل للنقابة العامة أو  يكلم تلفوناتها الأرضية يسأل ع المعاش محدش ح يرد عليه أو ح يجيله ايميل نسخ لصق فيه أرقام واتس وفايبر

وعموما إذا لم يسعكم أن تكونوا مع الحق لأي سبب أتفهمه فاصمتوا ولكن لا تصفقوا للباطل!

وأخيرا:
كلمة محبّة إلى جروب اتحاد مهندسي مصر (خريجي حكومي) مؤسسين وأعضاء:
واجب على كل مهندس شكركم على إحياءكم لاهتمام المهندسين بنقابتهم وبمهنتهم، فهذا إنجاز يحسب لكم قولا واحدا
صحيح ده لا ينفي تسبب الجروب في نشر بذور الفرقة والشقاق والخلاف بين المهندسين دون قصد من القائمين عليه
إلا أن العقل والمنطق يقول أن النظر للأمام بوعي والتحرك نحو المستقبل بثبات هما الحل الوحيد لتحقيق الأهداف
وأرجو مراعاة إن مؤسسي الجروب واضح ليهم طاقة احتمال مفيش داعي تضغطوا عليهم أكثر من اللازم
الناس عملوا اللي يقدروا عليه فالجروب لازم يتحرك مع نفسه وواضح إنهم سامحين بأي تحرك إيجابي بس بلا دعم
ودي خطوة معقولة وكويسة جدا لأن حقهم يختاروا عدم التأييد الصريح لجمع توقيعات جمعية عمومية غير عادية مثلا
والدور والباقي على أعضاء الجروب إنهم يستثمروا عدم الممانعة دي من مؤسسي الجروب في بدء خطوة عملية

مشكلة حضراتكم الرئيسية هي مشكلتي ومشكلة كل خريجي هندسة وهي قلة فرص العمل و ضعف الرواتب
حل هذه المشكلة موجود جوة نقابة المهندسين قبل أن يكون لدى وزارة التعليم العالي أو الحكومة
أنا والله مقدر ومتفهم بل ومتعاطف مع إحساس الظلم والقهر والألم بس والله والله والله الحل مش تظلموا آخرين
اللي حضراتكم مش واخدين بالكم منه إن الآخرين هما كمان مظلومين زيكم ويمكن أكتر
وتعالوا نحسبها بالعقل واحدة واحدة:


1-  عايز مساعدة في البحث عن وظيفة؟
النقابة طابخة قانون جباية كارثي في مجلس النواب ولازم كلنا نقف ضده عشان تسحبه من البرلمان وإلا ح نلبس كلنا في الحيط
القانون فيه اختبارات رسومها بلا سقف لكل الخريجين خاص وحكومي مش بس للقيد في النقابة وإنما طوال الحياة الوظيفية
وكمان عاملين أكاديمية علوم هندسية لو لجنة شفوي من النقابة معجبهاش ورق إثبات ممارسة المهنة من حقها تجبرك تروحها
وطبعا الكورسات رسومها بلا حد أقصى
يعني متوسط الاشتراك -اللي بقى إجباري كل سنة-  هو 2500ج لو حديث تخرج و12ألف لو خبرتك 15سنة
بل الأدهى من كده إنّ القانون ده بيحرم نص المهندسين من حقي المعاش والترشح للانتخابات:



2- قانون البناء الموحد لسنة 2008 لائحته التنفيذية المادة 131 تنص صراحة على إشراف مهندس على الأعمال
تقوم نقابة المهندسين تضيف كلمة غير قانونية في شهادات الإشراف بتكون نتيجتها إن مافيا المقاولات بتتهرب من توظيفنا
وبتقدر تطلع بعمارات وبمباني دون إشراف هندسي أصلا
يعني المهندسين خسرانين والدولة خسرانة بس المقاولين كسبانين بسبب جملة ضايفاها نقابة المهندسين والتفاصيل هنا


3-  بتشتكي من ضعف مستوى خريجين بعض الجهات التعليمية؟ الحل في المادة1 من النظام الداخلي
المادة دي تلزم النقابة ببيان الجوانب الفنية التخصصية في كل خريج قبل قيده بالنقابة
النقابة تقدر بموجب المادة دي تفرض امتحانات قبل القيد بالنقابة واللي يسقط من حقه يعيد الامتحان عادي
بس ع الأقل نضمن إن عضو النقابة لديه الحد الأدنى من المهارات والأساسيات والمعارف
اسألوا أنفسكم:
ليه النقابة مش مفعّلة المادة دي؟
الإجابة:
إما عشان مش متفرغين كالعادة
وإما عشان مش عايزين يحرجوا بعض الجهات التعليمية
لأن الاختبارات دي لو اتعملت فكل سنة ح نلاقي قائمة بمين سقط وخريج ايه ومين نجح وخريج ايه
والقائمة دي ح تؤثر بشكل مباشر على سمعة الجهات التعليمية دي بل وعلى سعر التحاق خريجي الثانوية العامة بها
لأن لما معهد أو كلية ثلاثة أرباع الخريجين منهما سقطوا في اختبارات عامين متتاليين طبيعي في السنة الجاية مفيش خريج ثانوي ح يقدم هناك

4- الخاص والحكومي ايد واحدة:
عمر ما كان فيه تفرقة بينا بدليل إن البوستات الوحيدة -تقريبا- اللي فيها حلول عملية مستندة إلى قانون نقابة المهندسين كان مصدرها خريج خاص هو كاتب هذه السطور سواء عبر دعوتنا لتفعيل المادة 1 من النظام الداخلي الحالي للنقابة لضمان جودة الخريجين المنضمين للنقابة، أو لإرسال تعديل على المادة 3 من القانون الحالي بحيث يكون للنقابة اليد العليا على أو المساوية لوزارة التعليم العالي في الرقابة والإشراف على المعاهد وتحديد النسب والأعداد، أو لجمع توقيعات على طلب مطبوع بموجب المادتين 15 أو 38 لعقد جمعية عمومية غير عادية ليس لسحب الثقة وإنما للتصويت على قرارات ملزمة للنقيب ومجلس النقابة بموجب المادة 28 الفقرة 3

يا ريت تمسحوا البوستات القديمة اللي فيها سخرية وإساءة وتقليل من الآخرين سواء خريجي خاص أو أساتذة الجامعة
على الجروب أعضاء ومؤسسين دور كبير في ترسيخ القيم الإيجابية و نشر البوستات الخالية من السب والشتم
بل يا ريت تغيروا اسم الجروب لاسم يجمع ولا يفرق، ويوجد ولا يشتت زي مثلا:
اتحاد مهندسي مصر (حكومي و خاص ايد واحدة)
أو
اتحاد مهندسي مصر (الجروب الرسمي)
أو
اتحاد المهندسين يا نقابة المهندسين
أو
ثورة نقابة المهندسين
ليست هناك تعليقات:

الأحد، مايو 12، 2019

س و ج قانون جباية نقابة المهندسين الكارثي في مجلس النواب

تحديث 7 مارس 2026: لن أنتخب م. هاني ضاحي بسبب كوارثه في تعديل قانون النقابة 2018 ثم مجلس الشيوخ مايو 2021

لن أنتخب م. هاني ضاحي لأن قانونه ح يدفّعنا متوسط 12,333ج كل سنة رسوم تجديد اشتراك النقابة إجباري!!!!
الخلاصة: قانون النقابة الجديد اللي أعلنت النقابة في 12 مارس تقديمه إلى مجلس النواب خلال أسبوعين وبالفعل اعتمده وزير الإسكان في 27 مارس وبدأت مناقشته تحت قبة مجلس النواب في 1 إبريل وبيتكلموا عن مهندسين مقيدين بس محرومين من حق المعاش عشان مش مشتغلين بعمل هندسي ومهندسين معتمدين (أعلى من المقيدين) - قانون الجباية الكارثي ده بدلا من أن يضيف حقوقا أو مزايا للمهندسين، أو حتى يعالج عيوب القانون الحالي، إذا به يلغي حقوقا أساسية نص عليها القانون الحالي مثل حق المعاش لكل عضو بغض النظر عن اشتغاله بعمل هندسي من عدمه، وحق الجمع بين معاش النقابة وأي معاش آخر، وحق إجراء انتخابات النقابة كل سنتين و أربع سنوات دون اشتراط موافقة "جهات معنية في الدولة"!

ده غير إلغاء حتى حق وجود حد أقصى للاشتراك السنوي في القانون (المتوسط في قانون الكارثي الجديد يبدأ من 2500ج سنويا لحديث التخرج ويزيد مع سنوات الخبرة بلا حد أقصى!) وعشان كده الحل الأهم دلوقتي تشيير مواد القانون من الصفحة دي أو لنكات تحميله من موقع مصراوي بختم مجلس النواب ومن الصفحة الرسمية لنقابة بورسعيد الفرعية عشان رفضنا مهم لإجبار النقابة على سحبه من البرلمان

سؤال1: ايه أبرز كوارث قانون جباية نقابة المهندسين الجديد؟
جواب:

  1. اختراع فنكوش جديد اسمه شهادة ممارسة مهنة تجدد سنويا بورق ومستندات بيد صاحب العمل بما يجعل المهندس تحت رحمته كي يجدد اشتراك نقابته كل سنة، وإلا أصبح تحت رحمة لجنة نقابية شفوية يحق لها كي تجدد شهادته أن تجبره على دراسة دورة تدريبية رسومها بلا حد أقصى:
    https://www.facebook.com/EngineersEgypt/photos/a.128909374504493/287583968637032/?type=3&theater
  2. المادة 9 تلزم المهندسين العاملين في القطاع الخاص سواء كانوا خريجي هندسة خاص أو حكومي بخمس اختبارات إجبارية مش بس للقيد بالنقابة وإنما حتى لممارسة العمل الوظيفي، وطبعا القانون مش مكتوب فيه حد أقصى لرسوم هذه الاختبارات أو حتى إمكانية لإعفاء غير القادرين من سداد رسومها
    https://www.facebook.com/EngineersEgypt/photos/a.128909374504493/287583968637032/?type=3&theater
  3. المواد 9 و 82 و 83 و 84: تقسيم المهندسين إلى مشتغلين بعمل هندسي (جدول القيد العام) وغير مشتغلين بعمل هندسي محرومين من حق الترشح في انتخابات النقابة (المادة10) ومن الحصول على معاش على طريقة نقابة المحامين في هذا الفيديو لنقيبهم :

    https://www.facebook.com/EngineersEgypt/photos/a.128909374504493/287449718650457/?type=3&theater

    (اضغط لتكبير الصورة) ملخص أبرز كوارث قانون جباية نقابة المهندسين الجديد في مجلس النواب - لاحظوا المادة 60 في أول سطرين في الركن العلوي الأيسر من الصورة حيث اشتراكات الأعضاء تحدد وفق عدد سنوات ممارسة المهنة!

  4. إلغاء حق جمع المهندس بين معاش النقابة وأي معاش آخر (المادة 81 من القانون الحالي والغير موجودة بإحدى نسخ القانون الجديد التي نشرتها الصفحة الرسمية لنقابة بورسعيد الفرعية)
  5. المواد 60 و 72 و 73 تلغي الحد الأقصى لرسوم تجديد الاشتراك السنوي للمهندسين العاملين في القطاع الخاص ليتراوح من متوسط 2500 جنيه لحديث التخرج إلى ما لا نهاية (متوسط 12ألف جنيه لمهندس ذو خبرة 15 سنة) عكس مهندسي القطاع العام والحكومة والقوات المسلحة المعفيين بموجب المادتين 9 و 74 من رسوم تجديد شهادة ممارسة المهنة حيث الحد الأقصى لتجديد اشتراكهم السنوي قدره 1500 جنيه عكس مهندسي القطاع الخاص المثقلين مش بس بأعباء مالية ولكن بمستندات تجديد اشتراك يتحكم فيها صاحب العمل
    https://www.facebook.com/EngineersEgypt/photos/a.128909374504493/287583968637032/?type=3&theater


    ودي طريقة حساب متوسط الاشتراك في القانون الجديد لمهندس قطاع خاص خبرته 15سنة:
    .
    1- ألف جنيه لتجديد شهادة ممارسة المهنة بحضور المهندس شخصيا
    (إتاوة جديدة إجبارية كل سنة في القانون الجديد اللي يمنع المهندس من العمل إلا بها)
    2- ألف جنيه رسوم تجديد الاشتراك السنوي
    .
    3- ألف جنيه غرامة عدم التصويت في الانتخابات كل سنتين (يعني 500ج كل سنة)
    .
    4- رسوم أربع اختبارات إجبارية طوال حياتك
    (القانون مش محدد قيمتها وبالتالي النقابة لها مطلق الحرية تحط الرقم اللي عايزاه!
    بما إن غرامة عدم الانتخاب في القانون وصلت ألف جنيه نقول الاختبار بألف وثمانمائة وخمسة وسبعين جنيه = 500ج كل سنة)
    .
    5- رسوم دورات أكاديمية العلوم الهندسية الفنكوش الجديد في تعديلات القانون
    دورتين خلال أربع سنوات
    أربع دورات قبل عشر سنوات خبرة
    خمس دورات قبل 15 سنة خبرة
    (إذا الاختبار بنخو ألفين جنيه فطبيعي الدورة الواحدة تكون بعشرة آلاف جنيه
    11 دورة أي 110ألف جنيه خلال 15سنة من التخرج
    يعني 7333ج كل سنة)
    .
    6- مصاريف مواصلاتك و إجازاتك عشان تروح النقابة كل سنة تجدد شهادة ممارسة المهنة و تدفع رسوم الاشتراك السنوي وفوق ده وده مصاريف حضور الدورات و مذاكرة الاختبارات = 2000ج كل سنة
    (بافتراض معاك عربية)
    .
    إذا متوسط الإجمالي كل سنة لتجديد عضوية نقابة المهندسين المحروسة:
    1000 + 500 + 1000 + 500 + 7333 + 2000
    = 12333 جنيه
  6. المادة 68 نقلت الإشراف على نقابة المهندسين من وزير الري (اللي وزارته شغلها مستقل لحد كبير عن شركات المقاولات الكبرى) إلى وزير الإسكان اللي اتحاد المقاولين وشركات الإسكان يقدروا يبعدوه عن الوزارة بمشكلة/استجواب لأن بعضهم أعضاء مجلس نواب وبعضهم شركاتهم متحكمة في معدلات تنفيذ مشروعات الإسكان التابعة للوزير - يعني مبروك علينا نقابة وخاص و حكومي ح نبقى تحت رحمة قطاع مقاولات من مصلحته تحجيم نقابة المهندسين أكتر وأكتر!

    بل الغريب أن مادة الدعوة للجمعية العمومية غير العادية في حال تقاعس مجلس النقابة أنيطت برئيس الوزراء لا الوزير (المادة 17) وهو ما يعني المزيد من العراقيل أمام جموع المهندسين الراغبين في مسائلة النقيب ومجلس النقابة إذ الوصول للوزير قطعا أسهل من الوصول لرئيس الوزراء
  7. الفقرة 20 من المادة 13 (أو المادة20 في نسخة نقابة بورسعيد) تشترط موافقة جهات معنية (كده بالحرف دون تحديد هي مين أو تبع وزارة ايه) في الدولة لإجراء انتخابات النقابة بما يعني استمرار النقيب الحالي ومجلسه للأبد إذا تأخرت الموافقات أو لم تصل حيث إن المادة لم تحدد مدة زمنية يجب خلالها استيفاء هذه الموافقات وإلا اكتفي بالتصويت الورقي دون الالكتروني.
  8. استمرار مشكلة القانون الحالي في عدم تفرغ القائمين على النقابة لإدارة شؤونها حيث يخلو القانون الجديد من تحديد راتب شهري محدد أو مدى range راتب شهري لأعضاء مجالس النقابة العامة والنقابات الفرعية والشعب كي يتشجع الشباب والراغبون للتفرغ للعمل النقابي على الترشح في الانتخابات باعتبار أن القانون الجديد سيضمن لهم راتبا محددا
  9. عدم إلزام مجالس النقابات العامة والفرعية والشعب بإرسال الميزانيات للجهاز المركزي للمحاسبات قبل العموميات بوقت كاف حيث إن القانون الحالي جعل ميزانيات النقابة -عمليا- غير خاضعة لرقابة الجهاز المركزي للمحاسبات بسبب ثغرة قانونية تلزمها بعقد جمعياتها العمومية العادية السنوية في فبراير/مارس من جهة (المادتان 15 و 38 من القانون الحالي)، ولا تلزم الجهاز المركزي للمحاسبات بزمن محدد لإنهاء مراجعاته الكاملة

    فالنقابة ترسل الميزانيات قبيل أيام من عقد الجمعيات العمومية فلا يتمكن الجهاز المركزي للمحاسبات إلا من مراجعة "بعض" أجزاء من الميزانيات هي التي يتم التصويت عليها وشكرا على كده وهذا الفيديو للجمعية العمومية للنقابة الفرعية بالقاهرة مثال واحد (الدقيقة السادسة):
    https://youtu.be/l3J2EKhtUCU
  10. استمرار مشكلة القانون الحالي المادة 49 والمادة 136 من النظام الداخلي واللتين تطلقان يد مجالس النقابات العامة والفرعية في الصرف و اتخاذ القرارات دون شفافية أو محاسبة أو حوكمة إذ الشرط الوحيد فيهما هو موافقة أغلبية أعضاء المجلس وشكرا على كده فكان طبيعيا أن يصل بدل حضور الجلسة الواحدة للعضو الواحد إلى 49 ألف جنيه:
    https://www.facebook.com/EngineersEgypt/posts/160477981347632

    أو إلى 18 ألف جنيه:
    https://www.albawabhnews.com/1153131
والمزيد عن مليارات النقابة هنا:
https://engineersegypt.blogspot.com/2018/12/supreme-council-members-benefits.html

وأرجو ألا يفهم من كلامي أن هنالك فسادا أو انحرافا لا سمح الله فالكل محترمون أفاضل نظيفو اليد، وإنما أشير فقط لتجاهل قانون الجباية الكارثي لأبسط قواعد الحوكمة والشفافية والرقابة على نقابة إيرادتها السنوية من بند واحد تتجاوز النصف مليار جنيه مصري




سؤال2: أنا مش مصدق الكلام ده!! ازاي النقابة تعمل مصيبة زي كده من ورانا؟! هما اتجننوا وللا انتو نصابين وللا ايه الحكاية؟!
جواب:





في 12 مارس 2019 أعلنت الصفحة الرسمية لنقابة المهندسين على لسان عضو هيئة المكتب وأمين الصندوق أنها ستقدم مشروع القانون الجديد إلى مجلس النواب خلال أسبوعين:
https://www.facebook.com/eea.org.eg/posts/2398681356822217 

وفي اليوم الثاني مباشرة بعد هذين الأسبوعين أي في السابع والعشرين من مارس 2019 نشرت صحيفة روز اليوسف الحكومية خبر اعتماد وزير الإسكان لهذا القانون قبيل إحالته لمجلسي الوزراء ثم النواب:
http://www.rosaelyoussef.com/news/details/434274

والفيديو أعلاه والذي نشر لأول مرة في الأول من إبريل يوضح أن القانون الجديد وصل مجلس النواب بالفعل وكلام سيادة النائب إيهاب منصور (رئيس النقابة الفرعية للجيزة وعضو مجلس النواب عن دائرة العمرانية) واضح في اختراع مسمى جديد اسمه المهندسين "المعتمدين" لأن كما شرحنا في إجابة السؤال الأول ليس كل أعضاء نقابة المهندسين ح يكون من حقهم الاستفادة من مزايا العضوية :(

يمكن تحميل مشروع قانون د.شيرين فراج بختم مجلس النواب هنا:
https://drive.google.com/file/d/1HZ5XT9y-TiBosmotdf59JqTCGe6yn9bO/

وهنا من موقع مصراوي:
https://www.masrawy.com/news/news_egypt/details/2019/3/6/1527063/-ي-ناقش-الأحد-المقبل-ننشر-نص-مشروع-القانون-الجديد-لنقابة-المهندسين

وقد نشرت مسودته الصفحة الرسمية لنقابة بورسعيد الفرعية (لاحظوا يا باشمهندسين الفرق بين القانون والمسودة هو إحالة المواد المثيرة لغضبنا إلى النظام الداخلي بحيث لا تكون ظاهرة للرأي العام في نصوص القانون نفسه):
https://www.facebook.com/portsaid.engineering.syndicate/photos/a.293989160623991/2023022157720674/?type=3&theater

وأعلاه هو القانون اللي اعترفت النقابة عبر صفحتها الرسمية في 13 نوفمبر 2018 بالتصويت عليه داخل المجلس الأعلى:
https://www.facebook.com/eea.org.eg/posts/2220169541340067


وللي ح يسأل طب اشمعنى نقابة بورسعيد الفرعية هي اللي نشرت مسودة القانون دونا عن باقي النقابات الفرعية والنقابة العامة؟
الإجابة نشرها السيد المهندس الحاتم عمران عضو مجلس نقابة المهندسين الفرعية بالبحيرة:
https://www.facebook.com/abodomran/posts/2210534139026075

ببساطة المسودة كانت تقصي رؤساء النقابات الفرعية من عضوية المجلس الأعلى للنقابة (وهو أعلى سلطة في النقابة) وبالتالي ربما كان رئيس النقابة الفرعية في بورسعيد شخصية مستقلة، أو ربما احتج عبرنشر المسودة للمهندسين عشان احنا نعمل الصح مع النقابة :)

يرجى ملاحظة أن نشر نقابة بورسعيد الفرعية كان بعد أربعة أيام من نشرنا كوارث المسودة وانتشارها بين المهندسين كالنار في الهشيم ووصل عدد الشير إلى ألف:
https://www.facebook.com/EngineersEgypt/photos/a.128909374504493/225986181463478/?type=3&theater


للأسف الشديد، نقابة المهندسين مسيطر عليها منذ عقود من جانب تيارات وأحزاب وجماعات مصالح ترتبط بشبكة علاقات قوية في جميع وسائل الإعلام المقروءة والمرئية والمسموعة، خصوصا وأن النقيب الحالي هو رئيس مجلس إدارة شركة وادي النيل للمقاولات المملوكة لجهاز المخابرات العامة

وده سبب إن مفيش حد فينا كمهندسين يعرف حاجة عن اللي بيحصل جوة نقابته أساسا

وده والله مش معناه إن النقباء أو مجالس النقابات ناس وحشين أو سيئين، بالعكس هم أفاضل الناس وكل حاجة
بس طبيعي يمثلوا مصالحهم ويدافعوا عن حقوق ممثليهم
خصوصا إذا أخذنا عامل عدم التفرغ في الاعتبار


سؤال3: بس قانون د.شيرين فراج رفضته مش بس الجمعية العمومية لنقابة المهندسين في 6 مارس 2019 وإنما حتى لجنة الإسكان داخل مجلس النواب في 10 مارس 2019


الرد على شائعة أن مشروع لقانون د.شيرين فراج رفضته الجمعية العمومية في 6 مارس 2019:
اللي حصل إن أحد السادة أعضاء مجلس النواب من المهندسين (د.م. محمد عبد الغني) طلع على منصة مسرح النقابة يوميها وقال أنا برفض القانون وناس سقفت وشكرا على كده لا حصل تصويت ولا حاجة

وحتى لو افترضنا نظريا حصول تصويت بالرفض فهو غير ملزم لا قانونا (قانون نقابة المهندسين الحالي لا يلزم النقيب أساسا بعرض القانون علينا أو حتى على المجلس الأعلى) ولا دستورا لأن مجلس النواب سلطة تشريعية مستقلة أساسا وبالتالي لن يوقف هذا الرفض المزعوم في الجمعية العمومية تمرير القانون في مجلس النواب


الرد على شائعة أن مجلس النواب رفض مناقشة مشروع الدكتورة شيرين فرّاج:
لجنة الإسكان في مجلس النواب صحيح رفضت مناقشة المشروع في العاشر من مارس (بحضور السيد النائب د.م.محمد عبد الغني وزميله النائب وعضو مجلس النقابة م.إيهاب منصور نقيب الجيزة) لكن اللجنة قررت في اليوم التالي الحادي عشر من مارس مناقشة قانون د.شيرين فرّاج ولـــكـــن بعد ورود رؤية ومقترحات نقابة المهندسين بحيث يكون القانونين قدام اللجنة سوا:
https://www.mobtada.com/details/821916
أي أن الجواب النهائي -على رأي جورج قرداحي :) - هو  أن اللجنة لم ترفض مناقشة مشروع قانون د.شيرين فرّاج فليه يا ترى يا هل ترى فيه ناس مهتمين يروّجوا لنصف الحقيقة الملغي دون النصف الآخر الساري ؟!!


سؤال4: طب ايه سرّ تكتم النقابة ع القانون الجديد وايه مصلحتها في تمرير كارثة زي دي؟
جواب:
ده قانون جباية كارثي سيثير غضب كل المهندسين فطبيعي نقابة المهندسين تكون حريصة على إحاطته بغموض تام لحين الموافقة عليه في مجلس النواب (بعض أعضاء المجلس الأعلى للنقابة هم أعضاء بمجلس النواب) لدرجة إن مستحيل تلاقي عضو مجلس نقابة مهندسين واحد في أي محافظة من محافظات جمهورية مصر العربية يجرؤ ينشر بوست واحد يعلن فيه رفضه لقانون الجباية الكارثي ده! تخيلوا باستثناء عضو مجلس نقابة المهندسين في الدقهلية الشاب محمد العالم ده الوحيد اللي أعلن رفضه علنا:

(اضغط لتكبير الصورة) سكرين شوت من بروفايل المهندس محمد إبراهيم العالم عضو مجلس نقابة المهندسين الفرعية في محافظة الدقهلية https://www.facebook.com/maebrahem1/posts/10155959156517584


بل معالي النقيب م. هاني ضاحي قال صراحة في لقاء أسيوط 19 إبريل إنه مش ح يفصح عن القانون الجديد وح يفرض الأمر الواقع عشان مش عايز زوابع:



بل الموضوع وصل إن رئيس إحدى لجان النقابة الفرعية بالإسكندرية اعترف إن النقابة بتعمل اتصالات تلفونية بأي حد بينشر لنكات القانون الجديد بعدم النشر وأنا شخصيا شفت عضو مجلس أعلى مسح اللنك حتى من تعليقات لآخرين على بروفايله ومكنش فيها أي كلام جارح أو خارج! والمزيد من التفاصيل هنا:
https://www.facebook.com/EngineersEgypt/photos/a.128909374504493/288327501896012/?type=3&theater



أما مصلحة النقابة فالموضوع ببساطة هو إن القائمين على النقابة مش متفرغين ليها حيث النقيب يحضر يوما واحدا في الأسبوع لأنه كسابقه رئيس مجلس إدارة شركة كبرى.

نتيجة عدم التفرغ هي إن أسهل وأوضح حل قدامهم لزيادة موارد النقابة لتمويل سداد المعاشات المتزايدة هو جيوبنا احنا المهندسين!
وده مشابه للي حصل في نقابة المحامين بالضبط:



عدم التفرغ ده مش بس كوارثه ظهرت في قانون جباية النقابة الجديد وإنما فيما هو أبسط ونكتفي بثلاثة أمثلة:

1- لو جرّب أي مهندس الاتصال بالتلفونات الأرضية لنقابة المهندسين في رمسيس ففي الغالب محدش ح يرد عليه
مش بس كده ولكن لو جربت تبعت ايميل للنقابة فالإجابة ستأتيك بعد بضعة أيام برسالة صماء بها أرقام واتساب وفايبر للتواصل!
 info@eea.org.eg

2- إنجازات معالي النقيب م.هاني ضاحي في النقابة خلال سنته الأولى ومن واقع تصريحاته هو وكلماته هو في حوارته الصحفية المنشورة والمذاعة كانت عشرة إنجازات نصفها توقيع بروتوكولات تعاون و مخاطبة نيابات للإفراج عن 5 مهندسين:






وبالمناسبة قانونا البناء الموحد و التصالح في مخالفات البناء مآلهما الفشل الذريع بسبب نقابة المهندسين للأسباب اللي شرحناها بالتفصيل الممل في اللنك ده:
http://engineersegypt.blogspot.com/2019/05/new-unified-building-law.html


سؤال5: طب الحل ايه؟
جواب: حاجتين اتنين ملهمش تالت

الحل الأولاني -بعد الشير وتعريف المهندسين بالكارثة اللي النقابة بتطبخها لنا جوة مجلس النواب- هو جمع 50 توقيع مسددين اشتراك 2017 بموجب المادة 38 من قانون نقابة المهندسين 66 لسنة 1974 على طلب عقد جمعية عمومية غير عادية في أقرب نقابة فرعية ليك في الموعد اللي تكتبوه في الطلب المطبوع (القانون لا يعترف إلا بطلب مطبوع وعليه التوقيعات):
https://docs.google.com/document/d/1Of1kqSIjrCzbiVYkOjNvYiuSc-GSSgVUNZAYrXsvP_8/edit

و/أو جمع 100 توقيع مسددين اشتراك 2017 بموجب المادة 15 من قانون النقابة على طلب عقد جمعية عمومية غير عادية فالنقابة بموجب نفس المادة ملزمة خلال شهر تحدد موعد الجمعية العمومية غير العادية دي والتي تلزم النقابة *** الـحـالـيـة*** و معالي النقيب *** الــحــالــي*** بموجب المادة 28 الفقرة 3 بتنفيذ كل قراراتها فور تصويت المهندسين عليها بنعم:
https://docs.google.com/document/d/1MZyJug3aiicz-Uv41PtR9sDwhw-n47h8k_5OFm3VxVk/edit

***ملاحظة مهمة: لـــيـــس مـــن بـيـن هذه القرارات ســحــب الــثــقــة لأنه مطلب غير قانوني أساسا ولكن يتم تصوير ده للمهندسين على غير الحقيقة إما عن غير علم وإما بهدف تخويفهم من أو تخذيلهم عن جمع التوقيعات ***

والحل التاني اشتغلنا عليه بالتوازي بشكل تطوعي ومستقل عن النقابة وهو نصوص مقترحة للقانون الجديد شملت أكثر من نصف مواد القانون الحالي وسميناها مسودة السيسي رئيسي بعد 2022 تأييدا للتعديلات الدستورية لأننا بدأنا شغل عليها في ديسمبر :)
https://www.facebook.com/EngineersEgypt/photos/a.128909374504493/287641625297933/?type=3&theater






سؤال6: مين بقى اللي ورا ثورة نقابة المهندسين؟
جواب:
أنا مهندس منوفي :) واسمي محمد أحمد عبد المطلب (دفعة 2006) و قلت اسمي ورؤيتي المتواضعة للنقابة في أول فيديو على الصفحة:



ورئيس مجلس أمناء المصري اليوم نشر رسالتي عن النقابة وعليها اسمي في العدد المطبوع من الصحيفة بتاريخ 9 أغسطس:
https://www.almasryalyoum.com/news/details/1313894

وهنا تفاعل الرأي العام معها تحت عنوان "حاجة تكسف":
https://www.almasryalyoum.com/news/details/1314351

ثم هنا تعليق معالي النقيب عليها في مقالين متتاليين:
https://www.almasryalyoum.com/news/details/1315482

https://www.almasryalyoum.com/news/details/1315764

ودي رسالة أخرى نشرها في سبتمبر 2018 الدكتور عمرو الشوبكي بها اسمي الرباعي وسنة التخرج:
https://www.almasryalyoum.com/news/details/1318270

وهنا رد السيد أمين الصندوق في النقابة عليها:
https://www.almasryalyoum.com/news/details/1321343

وهنا مقال باسمي نشر في العدد المطبوع من صحيفة الشروق اليومية في السادس من فبراير 2010
http://www.shorouknews.com/_Handlers/PDFHandler.ashx?dateForDownloadCount=02-06-2010&path=cabc11b5bcd14febb9eb00e3e4c8bdf54.pdf


سؤال7: والله العظيم شكلك كده إخوان وعايز ثورة مهندسين ضد الحكومة وسيات الريس خصوصا وإن المادة 60 واضحة زي الشمس في إن اشتراكات الأعضاء ورسوم استخراج شهادة ممارسة المهنة لا تزيد عن ألفي جنيه!
أصل اللي بتعمله النقابة ده ميدخلش الدماغ أصاحبي ولو كلامك صح يبقى عليه العوض ومنه العوض احنا ح نلاقيها من رفع دعم البنزين والكهرباء المنتظر في 1 يوليو ولا من هاني الضحضيحي هو كمان! هو اسمه ايه يا هندسة معلهش قوله تاني :)
جواب:
اسمه هاني ضاحي وأنا مش إخوان بل بعض أعضاء المجلس الأعلى في النقابة اتهموني إني أمنجي لأسباب ح أقولها بس بعد توضيح جزئية المادة 60

المادة دي فعلا قالت إن الحد الأقصى لتجديد الاشتراك السنوي هو ألف جنيه، وزيهم لاستخراج شهادة ممارسة المهنة ولـــكـــنْ!
المطب والمقلب في حاجتين اتنين أولهما تجديد شهادة ممارسة المهنة - ليه؟
1- لأن مطلوب فيها ورق ومستندات غير محددة وبيد صاحب العمل
وبالتالي ممكن تضطر تدفع فلوس لاستخراج الورق والمستندات دي وتوثيقها مثلا
ودي كلها رسوم ملهاش حد أقصى :(

2- وده الأخطر: إن الورق والمستندات دي سيادتك ح تقدمها زي الشطور إلى لجنة شفوي من النقابة
اللجنة دي من حقها طبقا لقانون الجباية الكارثي إنها ترفض الورق ده وتجبرك تاخد كورس في أكاديمية العلوم الهندسية للتجديد
وطبعا الكورس ده رسومه ملهاش حد أقصى :(

المطب والمقلب التاني موجود في رسوم الاختبارات الإجبارية للنقل من سجل إلى آخر (من حديث تخرج إلى أخصائي، إلخ) حيث إن رسومها بلا حد أقصى لأن القانون لا ينص على قيمة محددة لها وإنما تركها كالعادة بيد أكاديمية العلوم الهندسية

كمان عشان تنتقل من سجل لآخر لازم يكون معاك حد أدنى من عدد سنوات ممارسة المهنة
طب افرض إنك بتنتقل في شغلك أو اشتغلت برة الهندسة سنة مثلا أو إنك شغال حرّ أو إنك اشتغلت سنتين مع شركتين طلعوا عينك ورفضوا تسليمك الورق والمستندات اللي تثبت إنك مشتغل بعمل هندسي عشان تجدد شهادة ممارسة المهنة - الدين قصدي القانون بيقول ايه؟

القانون بيقول في المادة 9 (نسخة بورسعيد) إنك تدخل أكاديمية العلوم الهندسية تدرس لك كام دورة متحددين (أربع دورات مثلا للانتقال من ممارس إلى أخصائي) عشان تاخد إعفاء من إثبات ممارسة المهنة خلال السنوات السابقة لكي تترقى من سجل الممارس إلى سجل الأخصائي!

عرفت بقى إن الألفين جنيه دول مطب ومقلب مش أكتر عشان اللي مش واخد باله ومش مركّز في القانون يروح في الرجلين؟
وبعدين سيبك من كلامي وحمّل القانون من موقع مصراوي بختم مجلس النواب ومن الصفحة الرسمية لنقابة بورسعيد الفرعية

وكمان شغل مخك يا هندسة:
مش المنطقي والطبيعي في أي قانون جديد إن النقابة تتحاكى بحلاوته وجماله ومزاياه وتشرح لنا قد ايه ده قانون محصلش؟
تفتكر ليه ده محصلش؟
وليه النقابة شغالة تحت الطرابيزة كده ومش قايلة أي كلام عن فحوى مواد القانون أو خطوطه العريضة حتى؟
يعني لو هو قانون كويس وفي مصلحتنا احنا كمهندسين تفتكر الطبيعي إنهم يخرسوا كده؟
وللا المفروض كانوا ينشروه ويعتبروه من إنجازاتهم؟
تعرف يا هندسة إن أعضاء مجلس أعلى في النقابة مشافوش القانون أساسا وشافوه ع النت زينا؟

وآدي فيديو النقيب شخصيا بيقول ع الهوا لن أفصح عن مواد القانون و ح أفرض الأمر الواقع عشان مش عايز زوابع:
https://www.youtube.com/watch?v=cvAPIqd4-Vw

عايز ايه دليل أكتر من كده على إنهم عاملين مصيبة وعارفين إنها مصيبة وبيداروا عليها؟




نرجع بقى لموضوع إخوان ومش إخوان:


1- دعونا المهندسين لانتخاب الرئيس السيسي لفترة رئاسية ثانية في مارس 2018:
https://www.facebook.com/EngineersEgypt/videos/130435127685251

2- أيدنا التعديلات الدستورية:
https://www.facebook.com/EngineersEgypt/videos/376004969882042/

3- نشرنا نصوصا مقترحة لقانون النقابة الجديد وأطلقنا عليها اسم مسودة السيسي رئيسي بعد 2022 :)
https://www.facebook.com/EngineersEgypt/photos/a.128909374504493/227970314598398/?type=3&theater

4- عرينا جماعة الإخوان الإرهابية وفتواهم على موقعهم الرسمي في 28مايو2015 بقتل كل موظف حكومة ولو جوة المسجد بيصلي الجمعة :(
https://www.facebook.com/EngineersEgypt/photos/a.128909374504493/267020837360012/?type=3&theater




سؤال8: بس القانون الجديد يزيد إيرادات النقابة من الإسمنت والحديد والدمغة الهندسية ودي حاجة كويسة
جواب:
هذه كلمة حق يراد بها باطل للأسباب التالية:

1-  لو كان الكلام ده صحيح فايه لازمة إن النقابة تفرض رسوم اختبارات إجبارية وكورسات إلزامية ملهاش حد أقصى توصل بالاشتراك السنوي لأكثر من عشرة آلاف جنيه مصري؟ وايه لازمة إنها تقسمنا لمشتغلين بعمل هندسي وغير هندسي محرومين من الترشح في الانتخابات ومحرومين من معاش النقابة؟


2- قانون جباية نقابة المهندسين الكارثي الجديد اخترج دولة مستقلة جوة نقابة المهندسين اسمها أكاديمية العلوم الهندسية لإجراء الاختبارات الإجبارية والدورات التدريبية بفروع بالمحافظات ومجلس إدارة وشغلانة كبيرة سعادتك وراجع الكلام اللي قلناه في الفقرتين 9 و 10 من إجابة السؤال الأول عشان تعرف إن الأكاديمية دي ح تكون عاملة زي الثقب الأسود اللي ح يبتلع أي زيادة في إيرادات النقابة (وكله بالقانون :) للأسف :( ).



3- القائمين على نقابة المهندسين هم نقباء وأعضاء مجالس غير متفرغين
وصلاحياتهم في الصرف واتخاذ القرارات مطلقة لدرجة المادة 136 من النظام الداخلي تتيح لهم الصرف "أيا كان المبلغ المنصرف"
وكمان فوق كل ده مفيش أي رقابة مالية أو محاسبية عليهم كما شرحنا في الفقرة العاشرة من إجابة السؤال الأول أعلاه

ووالله مش معنى الكلام إنهم ناس وحشين أو أشرار خالص والله العظيم
هم أفاضل الناس علما وخلقا ونظافة يد وسمعة وكل حاجة
بس ببساطة أيضا هم غير متفرغين
أيهما أفضل:
شاب خبرته 4 سنين يدير فرع شركتك ويتواجد به طوال الأسبوع
وللا وزير سابق ح يروح يوم واحد بالأسبوع؟

4- قانون نقابة المهندسين الحالي بل وقانون البناء الحالي لسنة 2008 بتعديلاته يتيحان للنقابة زيادة الموارد وتوظيف المهندسين - فهل نجحت النقابة عبر مختلف مجالسها في ذلك؟
طبعا لأ
والدليل معدلات تحصيل إيرادات الدمغة الهندسية من الشركات والمؤسسات وغيره

للي عايز يعرف ليه المهندسين رواتبهم قليلة وليه قطاع الإسكان وجودة البناء في مصر بعافية شويتين وكل شوية عمارة تقع: السبب هو نقابة المهندسين!

لأن نص المادة 131 من اللائحة التنفيذية لقانون البناء الموحد 119 لسنة 2008 بيفرض وجود مهندس مشرف على أعمال البناء وغيره، فالنقابة ***الغير*** متحالفة مع مافيا المقاولات وحيتان الأراضي تعمل ايه بقى؟






أضافت النقابة جملة في شهادة الإشراف تلزم مالك العقار فور بدء البناء بإخطار المهندس المشرف بجواب مسجل فإن مرّ شهران بلا إخطار فالشهادة ملغية!

وبالعقل والمنطق هل فيه حاجة في الدنيا اسمها المالك يدفع فلوس شهادة الإشراف والمهندس يمضي عليها والنقابة تختمها وتقبض، عشان في الآخر المهندس ميشتغلش غير بإخطار من حضرة جناب المالك وقال ايه لو مستلمش الإخطار خلال شهرين فالشهادة لاغية عشان احنا نقابة حد الله ما بينا وبين الحرام! بتستعماني يا هرم :)

رغم أنّ المادة131 واضحة وصريحة في التزامات المهندس في الإشراف منذ اليوم الأول (دون الحاجة لانتظار فنكوش الإخطار) سواء في تقارير ربع سنوية أو غيره فضلا عن كون شهادة صلاحية الأعمال لا تصدر إلا عما تم تحت إشرافه بالفعل.


ممكن حد يقول لي طب وايه المشكلة إن النقابة تكتب في شهادات الإشراف إن لو المالك لم يخطر المهندس المشرف ببدء الأعمال تعتبر لاغية تلقائيا كده المسؤولية على المالك لو معملش إخطار والنقابة والمهندسين ملهمش ذنب

والإجابة:
اللي بيحصل إن المهندس بيبيع توقيعه على شهادة الإشراف والنقابة تقبض رسومها
وعمليا مفيش مهندس مشرف وبالتالي كده احنا كمهندسين بنخسر فرصة عمل
وواقعيا مقاول أو عامل بيشيل الشغل والعمارة تتهد على دماغ أصحابها قدام

طب لما النيابة بتحقق والموضوع يتحول للقضاء؟
المتهم الأول بيكون المهندس المشرف مش المحليات
لأن القانون لا يحمي المغفلين ولو كانوا نقابة المهندسين

يعني النقابة بالجملة اللي بتضيفها على شهادة الإشراف
هي كده مش بس بتضر قطاع الإسكان وأعمال البناء في مصر
وإنما بتضر المهندسين أنفسهم
لأننا حكومة ورق فاللي بيحصل إن الإلغاء التلقائي المفروض يوصل للمحليات من النقابة بس بيتحط في الدرج بعد ما تكون العمارة اتبنت وطلعت الدور العاشر خلاص ومحدش يعرف حاجة عن الإلغاء التلقائي ده إذا وصل أساسا لأن وارد يضيع في السكة بين النقابة والمحليات وكده كل طرف يكون مؤمن نفسه:
.
النقابة تقول احنا بعتنا جواب إلغاء والمهندس يقول موصلنيش خطاب مسجل ببدء الأعمال عشان أشرف والمحليات تقول احنا مستلمناش جواب إلغاء وعشان كده طلعنا الرخصة بناء على كده (وجايز الكحول يلبس تزوير شهادة الصلاحية مهو كده كده محدش طايله) - ودوخيني يا لمونة :) عشان يفلتوا من العقاب في النيابة أو المحكمة :( وفي الآخر المهندسين مش لاقيين شغل بسبب نقابتهم مش بسبب حد تاني :(


سؤال9: ايه أهمية تفرّغ أعضاء مجالس النقابة العامة والنقابات الفرعية والشُّعَب للعمل النقابي؟
جواب:
منتظر ايه من شخص غير متفرغ يدير محفظة مالية بمليارات الجنيهات؟
طبيعي المحفظة تخسّ بفعل عوامل الزمن لأنها مش بتزيد ولا بيتم تنميتها
وده يفسر ليه معاش المهندس اتسخط من 200 جنيه سنة 1974 = 6 أضعاف راتب ضابط جيش حديث التخرج = 333 دولار
إلى النهاردة في 2019 معاش يعادل 33 دولار فقط لا غير

وده يفسّر ليه احنا المهندسين مش مستفيدين من نقابتنا رغم تعاقب إخوان مسلمين وحراسة و يسار و أحزاب والآن وزير حكومي سابق عليها

مصر كلها حجزت في العاصمة الإدارية إلا نقابة المهندسين!
ملناش أرض لبناء مقر يكون تحفة معمارية ومزار يدرّ عائد!
وملناش لا أراضي ولا شقق لاستثمارها في مشروعات تنعش صندوق المعاشات!

رغم إن المطلوب كان خطاب رسمي من النقيب السابق أو الحالي لوزير الإسكان
أو مكالمة تلفون للهيئة الهندسية أو للحكومة أو للرئاسة
عرفتم حضراتكم ليه احنا ضد قانون جباية نقابة المهندسين الكارثي الجديد؟
لأنه حتى مش بيضمن تفرغ النقيب أو حتى بعض أعضاء المجلس براتب متحدد عشان يتابعوا أبسط حقوقنا اللي محدش فاضي لها

سؤال10: سمعنا إن فيه أكثر من قانون لنقابة المهندسين في مجلس النواب - مش جايز بتتكلموا عن قانون غير القانون اللي النقابة مقدماه؟
جواب:
كل هذه المشروعات اختلف أصحابها ولكنهم اتفقوا على جيوب المهندسين بمسميات مختلفة يعني مؤسسة العلوم الهندسية في قانون د.شيرين فراج = مركز التنمية المهنية المستمرة في قانون م.محمود عثمان = تنظيم القيد ومتابعة الأداء في قانون د.محمد عبد الغني :)



احنا نشرنا في إجابة السؤال الثاني أعلاه لنكات تحميل قانون د.شيرين فراج اللي قلنا إنه اتصوت عليه جوة المجلس الأعلى لنقابة المهندسين ورجّحنا إن ده القانون اللي نقابة المهندسين عايزة تمرره

كان فيه قانون آخر أيام سيادة النقيب السابق م.طارق النبراوي ومجلسه اللي كانت أغلبيته تيار استقلال المهندسين، والقانون ده كان متقدم بيه النائب د.محمد عبد الغني (عضو مجلس نواب حالي وعضو مجلس نقابة سابق) ووافقت عليه لجنة الإسكان في مجلس النواب في شهر مارس 2017 لكنه لم ير النور بعد انتخابات النقابة 2018 التي أتت بنقيب جديد ومجلس جديد:
https://www.alshouranews.com/1658478

هنالك قانون ثانٍ قدمه النائب م. محمود عثمان شقيق وكيل النقابة م.أحمد عثمان والذي يمكن الاطلاع على مقارنته بمشروع د.محمد عبد الغني هنا:
https://www.facebook.com/EngineersEgypt/posts/265224860872943

ليست هناك تعليقات:
الاشتراك في: الرسائل (Atom)