خدعوك فقالوا النقابة عمل تطوعي!

غيّر تفكيرك:
إلا من رحم ربي، مفيش حاجة اسمها العمل النقابي عمل تطوعي
لو اللي بيقول لك كده مهندس فاتح بيت يبقى لازم تسأل نفسك ليه مترشح
خصوصا لو مش أستاذ جامعة ومش مليونير ومش من آل عثمان

ايه اللي يخلي بني آدم طبيعي يدخل انتخابات
و يبقى تحت رحمة جهاز الكسب غير المشروع
ده غير المصاريف و التفرغ للدعاية ودوشة الإعلام و القيل و القال

لاحظ يا هندسة إن اللي عايز يخدم النقابة متطوع سهل جدا يعمل كده من غير ما يترشح في انتخابات النقابة :)
وبناء عليه ليه سمو سيادة الباشمتطوع رشح نفسه في الانتخابات؟
ده سؤال بيطرح نفسه و الحقيقة هو بيطرح كمان لوز و جوز :)

دي شوية حقائق عن مزايا عضوية مجالس نقابة المهندسين سواء النقابة العامة أو النقابات الفرعية:

1- لو مجلس النقابة وافق لك على صرف أي مبلغ ليك تحت أي مسمى أو حجة فالقرار قانوني و ساري وتروح بكرة الصبح تصرف الفلوس و ألف ألف مبروك يا سيادة العضو المنتخب - لدرجة ممكن أي رئيس نقابة في محافظة (نقيب محافظة يعني) يعزم 800 شخص ع الفطار في رمضان على حساب النقابة :)

2- ضبطية قضائية بنص القانون يعني لو حد مس شعرة من عضو مجلس نقابة منتخب يتحبس في جنحة الاتهام بالتعدي على سلطة ضبط قضائي

3- خمسة و خمسين ألف جنيه راتب شهري (باعتراف وكيل النقابة)

4- مليون جنيه بدل سفر سنوي

5- بدل حضور جلسة 49 ألف جنيه (للأمانة البعض زي السيد أمين عام النقابة الأسبق البدل كان 18ألف بس :) )

6- عربيات
7- لو مجلس النقابة وافق على تعيين أقاربك أو معارفك في النقابة أو توريدهم معدات أو خدمات للنقابة عبر شركاتهم فالقرارات قانونية و ألف ألف مبروك

8- الجهاز المركزي للمحاسبات بجلالة قدره مش ح يعرف يحاسبك عشان قانون النقابة يلزمها بعقد الجمعيات العمومية أول مارس فاحنا بنبعت الميزانيات للجهاز آخر فبراير ميلحقوش يراجعوها بالكامل و بيعملوا تقرير أول و مبدئي الجمعية العمومية بتوافق عليه و كل ميزانية و المهندسين طيبين :)

9- تواصل مع مسؤولين من أول رئيس الجمهورية وانت نازل خصوصا المحافظين ورؤساء الشركات ومدراء الأمن و قادة الجيوش و السلطات القضائية بما في ذلك حفلات و مناسبات المحافظات و الوزارات التي يحضرها أعضاء مجلس النواب، ده غير التواصل مع الدبلوماسيين و رجال الأعمال عرب و أجانب
(بحكم المنصب - وده سهل جدا يساعد في زيادة إيراد و مشاريع مكتبك الخاص أو تحقيق مصالح شخصية ولو حتى تأشيرة لحد من الأولاد)

10- وسائل الإعلام و الصحافة والتلفزيون تحت أمرك في نشر أي تصريح ولو كان بوست ليك ع الفيسبوك :)
هل ده يفسر ليه مرشحين بيطعنوا في المحاكم على انتخاب منافسيهم رغم إنهم المفروض متطوعين؟
جايز ليه لأ
 
هل ده يفسر ليه المهندسين استعوضوا ربنا في النقابة لأنهم مش مستفيدين منها حاجة؟
جايز ليه لأ



هل ده يفسر ليه رؤساء مجالس إدارة شركات كبرى و أعضاء برلمان بيترشحوا للنقابة رغم إن بديهي يكونوا مشغولين لشوشتهم في شركاتهم و دوائرهم؟
جايز ليه لأ



هل يفسر ليه أعضاء مجالس بيتخانقوا على مفاتيح أوض النقابة أثناء خلافاتهم الانتخابية؟
جايز ليه لأ

هل يفسر ليه أعضاء مجالس بيعلنوا انسحابهم من أول جلسة لمجلس النقابة عشان النصاب القانوني لا يكتمل بسبب اختلافهم مع النقيب المنتمي لكتلة أو تيار آخر؟
جايز ليه لأ

هل ده يفسر ليه بعض التيارات السياسية طول عمرها بتحارب للحفاظ على وجودها جوة النقابة؟
جايز ليه لأ

لو انت مفرفش ع الصبح و شايف إن معانا حق في دعوة المهندسين لتغيير تفكيرهم اعمل شير
#فرفشةصباحية