25 ديسمبر 2025 كتب مؤمن أشرف هدانا وإياه الله (المزيد عنه وعن انتماءه الإخواني هنا):
https://www.facebook.com/moamen003/posts/pfbid027uQ1RF1ngXMr38DHf5vgAGK3LAZvpeAzWGZu1H48zSof92shJmaqkTP1A9mqVW9cl
تأسيس الشركات الدفاعية الكبرى طريق خاطئ للمبتدئين..
خد مني المعلومة دي وهتدعيلي.. كلمة السر في الصناعات الدفاعية مش الشركات الكبيرة.. لكن ال SMEs(الشركات الصغيرة والمتوسطة)..
في فترة شغلي في الصناعات الدفاعية كنت بتعامل مع شركات صغيرة.. وأظن دي كانت أهم تجربة خليتني افهم اسرار الصناعة دي والجانب اللي مش كتير شايفه.. حرفياً ورشه.. او مساحة 60 متر في تكنوكنت في جامعة.. مثلاً اللي في الصورة دي التكنوكنت بتاعت الجامعة اللي درست فيها وموجود فيها 400 شركة ناشئة في البحث والتطوير.. وتلاقي عندهم طلاب متدربين (عشان يقللوا التكلفة).. وكل الفريق شباب صغير.. عددهم 5 أو 10 بالكتير.. وماسكين شغلانه صغيرة في مكون معين في نظام كبير بيتصنع في شركة كبيرة.. ودي الحته اللي هما متخصصين فيها.. بيخدموا بيها على الشركة التركية اللي هما شغالين معاها.. وفي نفس الوقت بيصدروا لشركات تانية بره تركيا نفس القطعة دي..
فكرة إنك تبص على دولة زي تركيا وتشوف بايكار أو أسيلسان فتقول أنا هعمل شركة كبيرة زيهم في مصر.. دي فكرة غلط وبتقول انك مش فاهم الصناعة دي٫ ولا شايف الصورة كاملة في البلاد اللي ناجحه فيها.. الشركات دي ببساطة مش في فراغ.. هي قمة جبل جليدي تحته آلاف الشركات الصغيرة والمتوسطة اللي بتصنع المستشعرات.. والدوائر الدقيقة.. والبرمجيات.. والمواد المركبة.. وأنظمة الاختبار..
الجزء الأكبر من التكنولوجيا والتصدير عالميًا مصدره ال SMEs اللي انت مش بتشوف اسمها في قائمة الشركات الكبيرة في أي بلد.. ومش بتطلع في الأخبار.. لكنها العمود الفقري للصناعة..
يعني لو ركزت تبني شركة كبيرة من فوق من غير قاعدة من الشركات الصغيرة تحتها.. هتطلع كيان هش.. شكله كبير على الورق.. لكن بيعتمد على الخارج في كل حاجة حساسة.. الطريق الصح يبدأ من تحت مش من فوق..
زي ما كتبت عن الصناعات الدفاعية الإماراتية.. ارقام قوية جدا.. لكن منقدرش نقول عندها صناعات دفاعية.. وهنا بالظبط السبب اللي خلاني اقول ان أرقام الإمارات هشة..
الشركات الكبيرة المشهورة هي آخر حلقة في السلسلة.. الصناعات الدفاعية مش مرحلة أولى.. هي ببساطة قمة الهرم التكنولوجي.. مش هتقدر تبنيها لو قاعدتك الاقتصادية والتعليمية والصناعية ضعيفة..
اللي بيحلم بصواريخ وطائرات مسيرة وأنظمة رادار متطورة بدون ما يبني اللي تحتها.. زي اللي عايز يبني ناطحة سحاب على رمل.. هتوقع في أول ريح.. ده إذا عرف يبنيها أصلاً..
الفكرة ببساطة إن الصناعات الدفاعية المتطورة.. خاصة اللي قيمتها التصديرية عالية.. مش بتبقى مجرد مصانع تجميع أو ترخيص.. لأن انت ببساطة بتصدر تكنولوجيا.. وبناء التكنولوجيا عملية تراكمية.. وده محتاج تعلم مستمر.. تدريب متخصص.. كفاءات عالية.. استثمار حقيقي في الشركات الصغيرة والمتوسطة.. اللي بتطلع الابتكار والمكونات الدقيقة اللي بتدخل في أي نظام دفاعي..
لو مفيش دولة في العالم قدرت تبني صناعات دفاعية قوية بدون القاعدة دي.. فازاي احنا هنعملها؟
سينغافورة عندها أكتر من 60 شركة دفاعية محلية غير ST Engineering.. بتركز على niches زي anti-drone systems من SMEs زي Flare Dynamics.. والحكومة بتفرض نقل تكنولوجيا على الأجانب عشان تبني كفاءات محلية.. عندهم نظام صناعي متكامل قادر يصدر dual-use products منتجات مزدوجة الإستخدام عالمياً..
الهند وصلت صادرات دفاعية 2.76 مليار دولار.. عندهم 16 ألف شركة صغيرة بتصنع إلكترونيات.. برامج Make in India بتربطها بالشركات الكبيرة.. عندهم لسه مشاكل ليها علاقة بالجودة وال product life cycle management لكن الدرس اللي قاصد اطلعه منها هو الاستثمار في الشركات الصغيرة ضاعف الصادرات.. مش انك تبني شركة كبيرة وتنتظر انك تدخل الصناعات الدفاعية بالشركة دي لوحدها..
تركيا اللي كانت قبل 2004 بتعتمد على الجيش والإنتاج المحدود.. دلوقتي عندها أكتر من 3500 شركة في القطاع الدفاعي.. معظمهم SMEs شركات صغيرة ومتوسطة بيشتغلوا في سلاسل التوريد العالمية.. وده خلى صادراتها الدفاعية في 2025 تعدي 7.45 مليار دولار في أول 11 شهر.. و5 شركات تركية في أقوى 100 عالمياً.. لكن الصادرات دي لو حللتها هتلاقي الجزء الأكبر منها جاي من شركات مش كبيرة ومعروفة..
وكالة الصناعات الدفاعية (SSB) بتدعم ال SMEs بقروض ميسرة.. السنة اللي فاتت ساعدت 25 شركة ب 25 مليون دولار.. وبرامج تدريب وتكامل مع الكبار زي بايكار وأسيلسان.. فال SMEs بقت تصنع إلكترونيات ورادارات ومكونات للطائرات المسيرة اللي بتصدر ل180 دولة..
مش صدفة إن خلوق جورجون رئيس SSB بيقول إن أحد أهدافهم هو دمج الSMEs في سلاسل عالمية لتصدير عالي القيمة.. لأن ببساطة هي دي القاعدة الصلبة لأي صناعات دفاعية..
كوريا الجنوبية هدفها تكون رابع أكبر مصدر دفاعي على سنة 2030.. عملوا ايه؟.. رفعوا ميزانية البحث للدفاع.. وبرنامجDefense Startup Open Innovation Challenge بيدي 60 مليون وون لكل startup مع تدريب وشراكات مع كاي وليج نيكس1 (أكبر شركات عندهم في الصناعه).. فال SMEs بقت تدخل معارض زي LIMA 2025 في ماليزيا بموصلات ألياف بصرية لصواريخ بسعر 70٪ أرخص وتسليم أسرع..
إسرائيل نموذجها مبني على startups وSMEs صغيرة ومرنة.. في 2025 وصل عدد ال defense startups ل 312.. زيادة 95٪ في سنة واحدة.. واخدوا مليارات استثمارات لأفكار مشاريعهم..
وزارة الدفاع عندهم حطت 10٪ من ميزانية البحث لل startups مش للشركات الكبيرة.. وبرامج iDEX بتسمح للشركات الصغيرة تدخل السوق بسرعة.. عشان كده شركات زي UVISION بتبيع لوحات انتحارية للناتو بمئات الملايين.. وال SMEs بتشتغل مع راينميتال الألماني.. ده كله من تعليم وتدريب بيحول الأفكار لمنتجات تصديرية في شهور مش سنين..
الدول دي كلها بتؤكد حاجة واحدة اقتصادياً.. مفيش دولة ضعيفة في التعليم والتدريب ومعندهاش SMEs قدرت تبني دفاع متطور تصديري.. تركيا استثمرت في 2400 شركة و 100 ألف موظف مدرب.. إسرائيل حولت الحرب لابتكار ل 300 startup.. كوريا وسينغافورة بنوا ecosystems بتدريب وحوافز.. العامل المشترك بينهم كلهم هو التركيز على الشركات الصغيرة والمتوسطة..
خد التويست ده.. لو قولت هركز على ال SMEs هتلاقيني بقولك برضو انت غلط والبداية مش ال SMEs.. لأنك متعرفش تعمل ده بدون منظومة تعليمية قوية بتشجع الإبتكار وبتطلع طالب فاهم كويس النظري والصناعة في نفس الوقت..
التعليم هو اللي بيخلق ال SMEs نفسها..
يعني إيه؟
يعني لما يكون عندك نظام تعليمي قوي بيربط الهندسة بالتصميم بالبحث بالتطبيق العملي.. هتلاقي الشباب اللي متخرجين مش رايحين يدوروا على وظيفة وخلاص..
لكن بيأسسوا شركات صغيرة متخصصة جدًا.. شركة بتعمل مستشعرات.. وشركة تانية بتطور برمجيات تحكم.. وغيرها بتشتغل في المواد المركبة أو الذكاء الاصطناعي..
الشركات الصغيرة دي هي المعامل الحقيقية للابتكار.. كل تجربة وكل خطأ وكل مشروع صغير بيتحول لخبرة متراكمة.. ومع الوقت بيتكون عندك Ecosystem كامل يقدر ينافس عالميًا..
من غير تعليم حقيقي مفيش مهارات.. وبدون مهارات مفيش شركات صغيرة.. وبدون شركات صغيرة مفيش صناعة دفاعية متطورة من الأساس..
يعني السلسلة كلها مترابطة.. تعليم يديك مهارات تديك SMEs تديك تكنولوجيا تديك تصدير وفي الآخر خالص تديك شركات عملاقة بتعمل منتجات قيمتها التصديرية عالية..
وفي نفس اليوم مساء كتب:
دليل الدول الصغيرة في ريادة التكنولوجيا
بلغاريا مثال مثير للدراسة.. لأنها دولة قالت احنا مش هتقدر تكون فرنسا أو ألمانيا أو حتى تركيا أو البرازيل أو كوريا الجنوبية في الدفاع التقليدي.. لكن نقدر نكون niche إقليمي في الذكاء الاصطناعي وعلوم الكمبيوتر.. واخدوا الذكاء الاصطناعي كمدخل للصناعات الدفاعية.. وده نموذج في رأيي ذكي وغير تقليدي.. مختلف عن فكرة انا هاخد نموذج ناجح واحاول انسخه عندي.. الفكرة دي بتفشل في معظم الأوقات..
تعالى نشوف بلغاريا الأول عشان ناخد فكرة احنا بنتكلم عن ايه..
بلغاريا بلد عدد سكانها 6.4 مليون نسمة.. عضو في الاتحاد الأوروبي والناتو.. نسبة البحث والتطوير من الناتج المحلي 0.8% فقط.. وده قليل بالنسبة لطموح أوروبا.. لكن ترتيبها العالمي في 2024 في مؤشر الابتكار العالمي هو المركز 38.. وده مركز متقدم بالنسبة لمواردها.. مش عاوز اقول أمثلة من دول تانية عشان الناس بتشخصن الموضوع.. بس المركز ده كويس جداً بالنسبة لبلغاريا.. متقدمة على دول كتير عندها موارد وقدرات أعلى منها..
تاريخياً بلغاريا قوية في الرياضيات وعلوم الكمبيوتر والبرمجيات منخفضة التكلفة عالية الجودة (ممكن اتعدت من روسيا زمان).. وعندها واحدة من أعلى نسب النساء في تكنولوجيا المعلومات في الاتحاد الأوروبي.. ده جزء من سرد البلغار عن قاعدة مواهبهم.. معرفش المعلومة دي هتفيد بإيه بس الكلام ده بياكل مع الأوروبيين عامة..
من ناحية الصناعة الدفاعية.. قاعدتها متوسطة الحجم.. عندهم تركيز تقليدي على الأسلحة الصغيرة والذخيرة وبعض المركبات المدرعة (تقريباً زي مصر).. ميزانيتها الدفاعية صغيرة مقارنة بفرنسا أو بريطانيا أو ألمانيا أو إيطاليا أو حتى تركيا..
مهم بس نركز في الحته دي.. الكلام اللي هكتبه ده كله نتاج تقريباً 5 سنين فقط.. وهنشوف ازاي عملوا طفرة في مدة قليلة زي دي..
عملوا استراتيجية في ديسمبر 2020.. قالوا احنا هنعتمد رؤية تطوير الذكاء الاصطناعي 2030.. الاستراتيجية دي طلعت من الأكاديمية البلغارية للعلوم ووزارة النقل وتكنولوجيا المعلومات والاتصالات..
عد معايا بقى طلع من الرؤية دي كام مشروع ناجح هنتكلم فيهم واحد واحد بشرح مبسط وسريع..
INSAIT
GATE
DIANA-NATO Test Center
BgGPT
EU AI Factory
الاستراتيجية دي ليها محاور رئيسية.. وبدل ما اوجع دماغك بيهم.. هقولك ان اساسها التعليم.. والتدريب.. والبحث العلمي.. ودعم الابتكار والشركات الناشئة..
لو هنتكلم عن أهم معهد في المبادرة دي فهوا INSAIT.. وتعالى نشوف ازاي معهد اتأسس من 3 سنين فقط بينافس مؤسسات علمية أمريكية عريقة..
المعهد اتأسس في 2021 ولكن تم افتتاحه رسميا في 2022 داخل جامعة صوفيا.. عامل شراكات مع ETH Zurich وEPFL من أقوى جامعات أوروبا في علوم الكومبيوتر والذكاء الاصطناعي.. عنده اشراف علمي من خبراء من ETH وEPFL وIST Austria وMIT وUC Berkeley وYale وPrinceton..
عنده تمويل حكومي حوالي 85 مليون يورو على 10 سنين.. وعنده مساهمات خاصة من شركات كبيرة زي Amazon Web Services وGoogle وDeepMind وSiteGround وVMware بقيمة 15 مليون دولار..
المعهد عامل منح دكتوراه ب 36 ألف يورو في السنة.. وده رقم كويس جدا مقارنة بتكاليف المعيشة في صوفيا.. وبينافس دول زي ألمانيا وفرنسا دلوقتي.. الحوافز دي جذبت كفاءات مهمة زي Prof. Luc Van Gool أحد أكثر الباحثين اقتباساً في علوم ال CV وال ML في العالم كله..
المعهد ده اتقبل منه 7 أوراق بحثية في CVPR 2025 وده انجاز يخليه في مقدمة دول أوروبا الوسطى.. ومتفوق على دول الشرق الأوسط.. وبيقربه من مؤسسات مرموقة زي Caltech وKing’s College.. وكل ده بنتكلم عن معهد عمره 3 سنين فقط..
في 2022 برنامج NATO DIANA اختار المعهد عشان يبقى مركز اختبارات البيانات الضخمة والذكاء الاصطناعي.. وده دخول غير تقليدي لبلد صغير في الصناعات الدفاعية عن طريق نموذج مختلف معتمد على تكنولوجيا واحدة متخصصه طوروها بشكل سريع..
عملوا برنامج BgGPT وده نموذج لغوي محلي ضخم.. وطوروا بعده BgGPT-Gemma-2 بتدريب خاص من بيانات بلغارية.. ودي تقدر تقول عليها شات جي بي تي وطني.. بيستخدموه في مصلحة الضرائب.. والسجل المدني.. والشرطة.. وغيرها من المجالات المهمة واللي فيها حساسية أمنية..
بلغاريا فيها 90 شركة ذكاء اصطناعي عندهم منتج جاهز وفي السوق.. واخدوا تمويل حوالي 52.7 مليون يورو في 2024 فقط.. وفي 2023 اخدوا تمويل 101 مليون يورو..
وبكده بلغاريا.. الدولة الصغيرة محدودة الموارد بتستحوذ على 8.4٪ من شركات الذكاء الاصطناعي في مجال الفنتيك في منطقة اسيا الوسطى وأوروبا الشرقية..
دخلوا خبرتهم في الذكاء الاصطناعي في عمليات البريد.. الشحن.. الخدمات القانونية.. السجل المدني.. روبوتات زراعة.. خدمات وتحقيقات الشرطة.. ومجالات تانية..
مهم نذكر إن تطبيقات الذكاء الاصطناعي في الشركات عندهم لسه في مستوى اقل من المتوسط الأوروبي.. لكن فيه تطور سريع وملحوظ..
النجاح في التجربة دي جاي من اختيار ذكي للمكان المناسب في السلسلة التكنولوجية العالمية..
بلغاريا مقالتش هنبني كل حاجة من أول رقاقة الكمبيوتر لحد السلاح.. لكن قررت تركز على تخصص محدد.. وقرروا يبقوا متميزين فيه لدرجة إن الدول الكبيرة نفسها تحتاج ليهم..
وده نفس منطق الدول الصغيرة اللي قدرت تتصدر العالم في مجالات دقيقة.. دول زي إستونيا في الحكومة الرقمية.. وأيرلندا في البرمجيات.. وتايوان في أشباه الموصلات..
جوهر الفكرة إنك مش مطلوب تنافس في كل حاجة.. لكن تبني قيمة مضافة واضحة تخليك لا غنى عنك جوه أي منظومة صناعية أو دفاعية أكبر منك..
بلغاريا اختارت تعتمد على جامعاتها المحلية، وشراكاتها الأوروبية، وتكلفة المعيشة المنخفضة.. وقدرت تبني منظومة علمية بتطلع ناتج حقيقي ومتطور ومطلوب..
بلغاريا باختصار عملت حاجتين.. ماخدتش نموذج ناجح وراحت تطبقه عندها.. لأن الفكرة دي فاشلة.. فيه أدبيات كتير بتتكلم على ان ال localization مهم.. وانك تبني نموذج خاص بيك بيناسب ظروفك وثقافتك والقاعدة الصناعية والمعرفية عنك.. اكبر مثال على ده محاولات الخليج لسنين طويلة انهم يعملوا وادي سيليكون خليجي.. اللي منجحتش لحد النهارده..
الحاجه التانية انهم فهموا اهمية الاستثمار في التعليم والبحث العلمي.. وطوروا قدرات مناسبة لإمكانياتهم.. بدون ما يبنوا احلام وردية صعب تتحقق..
لو خرجنا بدروس من التجربة دي فهيا واضحة وبسيطة.. الدول الصغيرة مش لازم تدخل سباق مين عنده أقوى دبابة أو أكبر مصنع طيارات.. لكن ممكن تدخل من باب المعرفة والتكنولوجيا الدقيقة.. وتبني برؤية واضحة.. وبذكاء.. وبأقل تكلفة ممكنة..
السؤال الصح مش ازاي ابقى زي الدولة كذا.. لكن إحنا نقدر نكون مميزين فين بإمكانياتنا وظروفنا؟..
وتبني كل سياساتك التعليمية والعلمية حوالين الإجابة دي.. لأن النجاح مش دايمًا بيحتاج موارد ضخمة.. لكن بيحتاج اختيار صح.. وإرادة حقيقية للاستثمار في العقول قبل المصانع..
وفي يوم 26 ديسمبر 2025 كتب:
استحواذات شركات الصناعات الدفاعية التركية والسيطرة على سلاسل الإمداد..
ايه علاقة شركة بايكار بإيطاليا؟ وليه اليونان بتشتكي للإتحاد الأوروبي من زيادة النفوذ التركي داخل الصناعات الدفاعية الأوروبية؟
الحته دي عاوزه كوباية شاي وتيجي نشوف على رواقة جانب غير معروف في الصناعات الدفاعية التركية.. جانب مختلف عن فيديوهات المسيرات٫ وأخبار الصفقات.. حتة بيزنس مع اقتصاد تدينا فهم اعمق للصناعة دي.. وتفاصيل اكتر مش متركز عليها..
رئاسة الصناعات الدفاعية SBB في 2022 عملت إلزام لأي شركة كبيرة هتاخد مشروع دفاعي انها تدي على الأقل 21٪ من حصة العقد للشركات الصغيرة والمتوسطة.. اسمها في تركيا KOBİ زي SMEs في الانجليزي.. دي خطوة مهمة لتغعيل دور الشركات الصغيرة والمتوسطه في الصناعة.. واللي كتبت قبل كده عن أهمية الشركات دي٫ وليه هيا مفتاح الصناعات الدفاعية..
في نفس الوقت فيه قانون الزامي تاني بيفرض على الشركات حد ادنى 2٪ من قيمة عقود الدفاع ان يبقى في توطين البحث والتطوير.. وده كان سبب ان مثلاً شركة TAI تنجز اكتر من 125 برنامج توطين وشغالين على 300 برنامج توطين جديد.. ده بيوفر تقريباً مليار دولار كل سنة كانت هتخرج من البلد للإستيراد..
كمل معايا٫ لسه هنيجي للموضوع لكن محتاجين الشرح ده الأول..
شركة TAI عندها هدف وهو انتاج 1500 مسيرة وطائرة تدريب وطائرة حربية على سنة 2034.. منهم 500 المقاتلة KAAN و350 هليكوبتر (اتاك وجوكباي).. و 600 مسيرة اكنجي واكسونجور..
شركة اسيلسان حققت في 2024 نمو 13٪ وزيادة EBITDA بنسبة 25٪ .. وبايكار عاوزه توسع الانتاج عشان تغطي طلبيات من 36 دولة.. ورفعت نسبة التوريد المحلي من 38٪ في سنة 2008 لأكتر من 70٪ في سنة 2020..
المشروعات الضخمة زي MİLGEM السفن الحربية.. بتستخدم تقريباً 65٪ موردين محليين.. و 48٪ من الموردين دول شركات صغيرة ومتوسطة..
المعلومات دي كلها بتقول ان فيه طموح.. لكن الامكانيات نفسها مش متناسبة مع الطموح ده.. فيكون الحل في الاستحواذات.. لأن الطموح ده٫ مع زيادة الطاقة الانتاجية مع أهميته لكنه في نفس الوقت مشكلة كبيرة.. كتبت عنها قبل كده لما اتكلمت عن جنوب أفريقيا وازاي زيادة الانتاج وضعف الطلب دمر الصناعات الدفاعية كلها..
طيب في تركيا الطموح ده محتاج تنسيق سلاسل الإمداد وخفض التكاليف الادارية واللوجيستيه.. ومحتاج استقرار مالي.. مين اللي يعرف يحققلهم المعادلة دي؟
بالظبط.. الشركات الصغيرة والمتوسطة.. عندها قدرة على الوصول لتمويل سريع.. عندها سوقها اللي بتخدم عليه من قبل كده.. وعندها مرونه اكبر في الحركة والتطوير عن شركة زي TAI مثلا اللي فيها الاف الموظفين وهياكل ادارية وسلسلة اتخاذ قرار طويلة..
بايكار مثلاً استحوذت على شركة Piaggio الإيطالية في 2024 ودي احد اقدم شركات الطيران الإيطالية.. وبسب الاستحواذ ده بايكار بقت تقدر تصنع منتجات الشركة الايطالية في مصانعها وفي نفس الوقت بقت فرصة لبايكار تتجاوز عواقب التعريفات الجمركية وقيود التجارة.. وساعدها توصل لسلاسل الإمداد الأوروبية من خلال شركة جاهزة وموجوده وشغلها موجود على معايير الناتو والاتحاد الاوروبي..
شركة SYS التركية في 2023 استحوذت على AEI Systems Ltd البريطانية.. دي شركة بتنتج مدافر عيار متوسط.. الشركة التركية اخدت 80٪ من الحصة بقيمة حوالي مليار ليرة تركية وقتها.. وده وزع الانتاج والتطوير بين تركيا وانجلترا.. وبالتالي فتح اسواق اكتر للشركة التركية تعرف تدخلها عن طريق الشركة البريطانية.. وعمل توزيع للمخاطر والانتاج في نفس الوقت..
في نفس السنة 2023 شركة Nurol التركية استحوذت على شركة IndustrieKeramik Hochrhein (IKH) الألمانية.. ودي شركة بتعمل مواد خزفية مهمة للمدرعات والدبابات.. وبالتالي وسعت نشاط شركة نورول التركية في مجال السيراميك الباليستي.. والشركة بقى ليها سيطرة اكبر على سلاسل الإمداد سواء ليها او لأسواق أوروبا..
السنادي شركة ARCA Savunma التركية استحوذت على شركة Esplodenti Sabino S.p.A الايطالية.. ودي شركات ذخائر وخدمات التخلص من المتفجرات.. الشركة دي مهمة للناتو والاتحاد الاوروبي وليها عقود شغالة مع وزارة الدفاع الإيطالية.. وفيه اخبار عن خطط للشركة التركية انها توسع نشاط الشركة الايطالية في الصواريخ والذخائر المدفعية.. وبالتالي تدخل السوق الأوروبي عن طريقها..
شركة Sarsılmaz التركية قبل كده كانت اشترت شركة Vincenzo Bernardelli الإيطالية.. ودي شركة اسلحة خفيفة.. ونقلت الانتاج بتاعها لتركيا وحافظت على العلامة التجارية الإيطالية.. لكن برضو وقتها قدرت تغرق السوق الأوروبي بمنتجات ارخص٫ وبجودة عالية.. بسبب الاستحواذ ده..
شركة ASSAN الشهر ده من كام يوم اعلنت انها استحوذت على شركة Dynaflow Technologies الجنوب أفريقية.. ودي شركة بتصنع صواعق للذخائر.. الاستحواذ ده تم عشان يساعد الشركة التركية توسع خطة البحث والتطوير وتدمج قدراتها مع قدرات الشركة الجنوب أفريقية.. في نفس الوقت اللي تفتح فيه سوق يخدم على الشركتين سواء داخل او خارج تركيا..
الاستحواذات دي مش فقط خارج تركيا.. فيه استحواذات مهمة حصلت داخل تركيا..
شركة Sarsılmaz استحوذت على شركة Yavaşçalar Av Spor Malzemeleri ودي شركة ذخائر رياضية وصيد.. وبرضو بهدف توسيع الانتاج٫ والسيطرة الأفقية على السوق.. وبعدها في 2024 استحوذت على شركة Best Group اللي بتعمل ابراج تحكم عن بعد عشان تبقى لأول مرة تدخل مجال الأنظمة البرية والبحرية..
وأخيراً مجموعة شركات Nurol Holding في سنة 2024 استحوذت على حصة BAE Systems الانجليزية في شركة FNSS التركية الرائدة في تطوير وانتاج المدرعات.. وده مش استحواذ على شركة صغيرة أو متوسطة.. لكن استحواذ مهم لشركة نورول عشان تسيطر على السوق وتبقى المالك الوحيد ل FNSS وبالتالي تطور توطين الملكية الفكرية لمنتج تركي مهم..
الزاوية اللي غالبًا مش بنبص عليها في موجة الاستحواذات دي هي إن تركيا بتحاول تتحول من مورد مكونات لمهندس المعمار بتاع السلسلة كلها..
يعني مش بس تصنع قطعة وتبيعها.. لكن تبقى هي اللي بتصمم الشبكة.. وتحدد مين يدخل ومين يطلع.. ومين يعيش ومين يختفي من السوق.. لما شركة تركية تشتري مصنع ذخائر في إيطاليا.. أو سيراميك باليستي في ألمانيا.. أو صواعق في جنوب أفريقيا.. هي مش بس بتفتح سوق جديد.. لكن بتخلق حالة اعتماد متبادل.. أوروبا محتاجة قدرات الشركة اللي بقت مملوكة لتركيا.. وتركيا محتاجة السوق الأوروبي عشان تزود حجم إنتاجها..
هل الاستحواذات دي حاجه كويسه ولا حاجه هتضر الصناعة دي؟
ده سؤال اختلف فيه العلماء بصراحة.. يعني ليها فوايد منها فتح اسواق جديدة.. السيطرة على سلاسل الإمداد.. اللي كتبت قبل كده عن كونها أمن قومي في حد ذاتها.. من فوايدها برضو انها بتقلل الاعتماد على الاستيراد.. وبتفتح سوق خارجي بقيود أقل ومرونه اكبر.. وخاصة السوق الأوروبي اللي تركيا داخله عليه بقوة لدرجة ان اليونان وقبرص اليونانية بيشتكوا للاتحاد الاوروبي كل شهر عن زيادة نفوذ الصناعات الدفاعية التركية داخل أوروبا..
لكن في نفس الوقت فيه سلبيات خطيرة للاستحواذ عامة.. منها إنه ممكن يوصلنا للاحتكار.. وان عدد قليل من الشركات تبقى مسيطرة على السوق والصناعة.. فيه تقرير عن قطاع الطيران والدفاع التركي قال ان القطاع ده في تركيا هو هرمي مع قاعدة ضخمة من الموردين الصغيرين.. وقمة محدودة العدد.. وعشان كده الاستحواذ بيحتاج دايما اعادة ضبط للهرم ده.. لأن أهم جزء في الهرم الصناعي هو الشركات المتوسطة.. واللي بتقل مع الاستحواذات دي.. وان الشركات المتوسطة تقل ده معناه ضرر بالمرونه والابتكار في المنظومة كلها..
الاستحواذ بيفقد الشركات اللي تم الاستحواذ عليها جزء من مرونتها وقدرتها على الابتكار.. وفي احيان كتير بتتحول من منافسة مفتوحه في السوق لمجرد قسم جديد في الشركة الكبيرة..
فيه تقارير أوروبية بتقول ان صفقات استحواذ تركيا على شركات داخل الاتحاد الأوروبي بتقدر الشركات دي تاخد تمويل من الاتحاد الأوروبي بيخلق منافسة غير متكافئة للشركات الأوروبية٫ وبيثير قلق دول منهم اليونان..
فيه سلبية ولكن فيها جزء ايجابي في نفس الوقت.. وهي إن نقل جزء من القدرات الصناعية والانتاجية لخارج البلد ممكن يكون فيه ضرر على الصناعة نفسها.. لكن فيه ايجابية مهمة وهي توزيع المخاطر.. ودي حاجه مهمة في صناعة زي صناعة الدفاع..
هنا بيظهر سؤال مهم.. في لحظة أزمة سياسية بين تركيا والاتحاد الأوروبي.. مين هيضغط على مين؟
هل تركيا تقدر تستخدم سلاسل الإمداد كسلاح سياسي ناعم؟ ولا العكس الشركات دي هتتحول لأدوات ضغط من جوه المنظومة التركية نفسها عشان تخفف الصدام مع أوروبا؟
لأن دي شبكة مصالح معقدة.. جزء منها قوة وجزء منها نقطة ضعف لو مفيش سياسة صناعية واعية بتحط قواعد لعب واضحة.. وتحمي طبقة الشركات المتوسطة من الذوبان جوه الكيانات العملاقة..
في رأيي ان فيه موجة بتزيد من الاستحواذات التركية.. منقدرش نشوفها مجرد أخبار صفقات ملهاش علاقة ببعض.. لكن هي جزء من محاولة نقل الصناعات الدفاعية التركية من مرحلة اللحاق بالركب لمرحلة إعادة رسم الخريطة نفسها..
تركيا بتحاول تبقى جزء من قلب سلاسل الإمداد الأوروبية.. ورافضة تاخد دور على الهامش.. وبتستخدم مزيج من الشركات الصغيرة والمتوسطة.. والاستحواذات.. وسياسات التوطين عشان تبني لنفسها مكان ثابت جوه نظام دفاعي عالمي بيتغير..
والسياسة دي رغم ان ليها سلبيات لكن في النهاية اللي هيفرق هو هل تركيا هتعامل الاستحواذ كسلاح استراتيجي طويل المدى يتحط جوه إطار واضح يحافظ على التنوع والابتكار.. ولا كطريق سريعة لتضخيم أرقام الصادرات والأرباح على حساب قوة منظومة الصناعات الدفاعية التركية على المدى البعيد.. وهنا فرأيي إن المعركة الحقيقية مش مع اليونان في شكاوى الاتحاد الأوروبي.. لكن جوه أنقرة نفسها.. في طريقة إدارة الهرم الصناعي الدفاعي التركي.. وحماية الطبقة اللي شايلة الصناعة من تحت..
