أهلا بيكم في الحلقة الأولى من برنامج عاشت دماغي حرة مستقلة، البرنامج هدفه إسعاد المهندس المصري اللي قلبه اشتكى من نقابة المهندسين ومحتاج هشتكة
.
نبدأ باسم الله الرحمن الرحيم ونقول إن فيه مهندسين كتير مش مبسوطين في شغلهم سواء بسبب الراتب أو مكان الشركة أو ظروف الشغل عموما، وفي أحيان كتير بيكون معاهم حق في عدم انبساطهم ده يعني مش بيدلعوا ولا حاجة
.
تعمل ايه بقى ياباشمهندش في الظروف دي؟
الحل الأولاني تكتب بوستات عن غدر الصحاب و نفسنات ءذالشغل، وليلك ونهارك تشتكي من ظروف البلد ومن مديرك اللي بيقرفك في الشغل - آسف للتعبير يعني
.
الحل التاني هو إنك تشغل مخك و تفكر بشكل حر و مستقل، و تسأل نفسك سؤال افتراضي:
يا ترى يا هل ترى لو صاحب الشركة أو مدير مديرك شخص محترم و قال لك انت كويس واحنا عايزينك، وإنه مسافر برة شهرين ولما يرجع ح يزود راتبك و يرقيك
يا ترى شعورك و مشاعرك ونفسيتك ح تكون عاملة ازاي وانت نازل كل يوم من بيتك رايح للشغل خلال الشهرين دول؟
أكيد ح تكون مبسوط وطاير في السما، رغم إنّ مديرك المزعج ده لسة موجود، ورغم إن الشغل برضه مواصلاته بعيدة عن بيتك، ورغم إن الراتب برضه مش بيكفيك
.
ليه بقى يا باشمهندس أحوالك اتحسنت مليون درجة للأفضل، رغم إن عمليا ولا حاجة اتغيرت في حياتك للأحسن خلال الشهرين دول؟
.
الإجابة: سيادتك بقيت سعيد عشان انت قررت إن بعد شهرين الدنيا ح تتحسن وبقى عندك أمل و ثقة في المستقبل، رغم أن ممكن مثلا مدير مديرك يموت وهو مسافر، أو إن صاحب الشركة يضطر يبيع الشركة وهو مسافر
.
اللي عايز أقوله إنك كان ممكن جدا تدور على فرصة شغل أفضل من غير انتظار وعد مدير مديرك أو صاحب الشركة، وبالتالي بدل ما تنزل من بيتكم الصبح متضايق من الشغل و المدير ومن البلد كلها، ح تنزل مبسوط ومبتسم وبتقول لنفسك:
.
"أنا نازل أعمل شغلي النهاردة بكل أمانة و ضمير رغم غلاسة مديري، عشان ربنا يبارك لي في وقتي في الويك إند أقدم على وظائف مناسبة ليا وأستفيد من الخبرة اللي بكتسبها في شغلي الحالي إني ألاقي شغل تاني براتب أعلى و ظروف شغل أحسن، عشان ربنا قال في القرآن الكريم (و من يتق الله يجعل له مخرجا و يرزقه من حيث لا يحتسب)"
.
لو عايز دماغك تعيش حرة مستقلة انتظرني الأسبوع الجاي مع أمثلة عملية لتحسين ظروف شغلنا و حياتنا
مع تحياتي
مهندس محمدأحمدأبوأحمد
المرشح القادم لمقعد نقيب عام المهندسين في انتخابات النقابة 2022 إن شاء الله
تابعوني على الصفحة الرسمية للحملة الانتخابية:
http://www.facebook.com/EngineersEgypt
تابعوني على الصفحة الرسمية للحملة الانتخابية:
http://www.facebook.com/EngineersEgypt
