الأسبوع ده المجلس الأعلى صوت ع التعديلات الآتية في قانون نقابة المهندسين رقم 66 الصادر سنة 1974م [واحنا كمان بنصوت معاهم والله من الغلب و المرار 😭 ]:
1- ألف جنيه حد أقصى للاشتراك السنوي! [=الاشتراك ح يبقى ألف جنيه ]
2- ألف جنيه حد أقصى تجديد شهادة ممارسة المهنة كل سنة إجباريا [إتاوة جديدة]
3- ألف جنيه غرامة عدم التصويت في انتخابات النقابة [بدلا من جنيه واحد]
4- ألف جنيه رسوم قيد في النقابة
5- فتح ثغرة الجمع بين التصويت الالكتروني و الورقي لاشتراط موافقة "الجهات المعنية في الدولة" قبل إجراء الانتخابات، يعني لو الجهات دي موافقتش فمفيش انتخابات و المجلس الحالي مكمل معانا للأبد 😃
[عكس القانون الحالي يتيح الورقي و الالكتروني من غير موافقات الجهات المعنية المجهولة دي!]
6- إسقاط عضوية المهندس الغير ممارس للمهنة (مدير بقى، صاحب شركة تجارية، فنان، ممثل، صحفي، إلخ) ما لم يتكرم عليك المجلس الأعلى للنقابة ويستثنيك
[وطبعا إسقاط العضوية = مفيش معاش و لا خدمات]
7- سحب سلطة لجان النقابة العامة و النقابات الفرعية و المتطوعين في اقتراح و تنظيم دورات تدريبية للمهندسين لتكون حصريا اختصاص المجلس الأعلى للنقابة العامة (وليس أية جهة أخرى)
8- ألفا دولار كل سنة يدفعها كل مهندس أجنبي
[ح تدفع يعني ح تدفع حتى لو مهندس سوري أو فلسطيني أو من جنوب السودان، أو سوداني أو يمني أو عراقي :( ]
9-خمسة وعشرين ألف دولار يدفعها أي مكتب استشاري أجنبي كل شهر وممكن كل 6 أشهر وممكن كل سنة وممكن كل سنتين حسب مزاج النقابة
[الإتاوة شطارة مفيش كلام]
10- اختراع فنكوش جديد اسمه أكاديمية العلوم الهندسية:
يعني النقابة ح تشفط بتاع ألفين جنيه في المتوسط كل سنة ده الاستفتاح بتاع المعلمين - قصدي المهندسين :)
إنما الأكاديمية دي بقى إن شاء الله ح تشفط كل الباقي في جيبك يا هندسة من غير لا سحر و لا شعوذة كالتالي:
- رسوم اختبار إجباري للانتقال من خريج إلى ممارس ثم إلى أخصائي ثم إلى استشاري ثم إلى خبير
- رسوم دورتين عشان تبقى مهندس ممارس (ممكن استبدالهما بدبلوم أو 4 سنوات ممارسة)
- رسوم أربع دورات عشان تبقى مهندس أخصائي (ممكن استبدالها بماجستير أو 10 سنوات ممارسة)
- رسوم 5 دورات عشان تبقى مهندس استشاري (ممكن استبدالها بماجستير أو 15 سنوات ممارسة)
طبعا ممارسة المهنة التعديلات مايعة في إثباتها - مثلا "يعتد بالعقود التي أبرمها المهندس" أيوة يعني مثلا أي ورقة عقد أحد طرفيه مهندس كده مهندس ممارس؟ وللا النقابة ح تحط العقدة في المنشار عشان المهندس يدفع دم قلبه في الدورات بتاعت فنكوش أكاديمية العلوم الهندسية؟
مثلا التعديلات بتقول "المهندسين في الخارج يعتد بشهادة من جهة العمل موثقة من الخارجية" طب ازاي النقابة تعرف إن دي جهة العمل أساسا؟ هل النقابة فيها أدراج فاضية عايزين تملوها بورق للفيران وخلاص مثلا!
وعايزين تجديد شهادة ممارسة ليه أصلا كل سنة؟
هل بتدوروا على حجة عشان تزودوا عدد موظفين النقابة ع الفاضي؟
القاهرة فيها ثلث المهندسين لوحدها
يعني ألف مهندس داخلين النقابة كل يوم بس عشان شهادة ممارسة المهنة
يعني تقريبا 3 مهندسين كل دقيقة - هل النقابة فيها مكان و عدد موظفين كفاية؟
.
نقابة الإسكندرية فيها أكثر من 80 ألف مهندس
لو نصهم بس ح يجددوا شهادة الممارسة كل سنة يعني 160 مهندس كل يوم
يعني مهندس كل 3 دقائق - هل النقابة اللي مش عارفة تعمل موقع الكتروني فيها مكان و عدد موظفين كفاية؟
هل اشتراط تقديم المهندس شخصيا لطلب تجديد شهادة ممارسة المهنة حجة عشان تتفرض رسوم بالدولار على المهندسين في الخارج كل سنة غير مصاريف التوثيق في القنصلية أو السفارة؟ مش ناقص غير النقابة اللي مشافوش منها حاجة تمد ايديها كمان في جيوبهم!
وللي ح يقول لي معالي النقيب صرح بأن بعض التعديلات دي لم تلقى القبول من أعضاء المجلس الأعلى - أقول: كون أعضاء في المجلس الأعلى للنقابة يعملوا لجان استماع ويوصلوا للتعديلات دي يبقى كده النقابة فعلا في وادي و المهندسين في واد آخر تماما
مجرد تقديم تعديلات قانون نقابة المهندسين دي للتصويت عليها في المجلس الأعلى دي كارثة في حد ذاتها
وأنا والله لا ألوم السيدات و السادة القائمين على اللجنة، بل جهدهم مشكور وكل حاجة و تعبهم مقدر، لكن نرجوهم أن ينشروا التعديلات قبل التصويت عليها ولو على صفحة النقابة الرسمية
ولو إن ده يرجعنا تاني لكارثة إنهم غالبا غير متفرغين وده مش ذنبهم فالنتيجة إن كل حاجة بتتعمل بسرعة ودون دراسة و نظرة شاملة
(وأعتذر عن بعض التعليقات الساخرة أعلاه وهي موجهة لحال النقابة عموما وليس للجنة لأن أعضاءها زينا ضحايا للنقابة و قانونها اللي عفى عليه الزمن)
شير لو عايز تقول لنقابة المهندسين لا تقرصينا ولا عايزين عسلك 😃
