القانون الجديد: لا معاش لغير المشتغل بعمل هندسي!

كنا اتكلمنا هنا بالتفصيل الممل عن قانون جباية نقابة المهندسين الكارثي في مجلس النواب واللي بيحرمنا من حقوق منصوص عليها بالقانون الحالي رقم 66 لسنة 1974
النهاردة ح نتكلم عن كارثتين في القانون الجديد ضد مهندسي المعاشات تحديدا

الكارثة الأولى:
إلغاء حق الجمع بين معاش النقابة وأي معاش آخر:

قانون نقابة المهندسين الحالي فيه مادة رقمها 81 بتقول "يجوز الجمع بين المعاش المقرر من النقابة وأي معاش آخر من أية جهة أخرى طبقاً لأي قانون أو نظام معاشات آخر"

المادة دي اختفت بقدرة قادر وفي لمح البصر من مسودة قانون الجباية الجديد اللي صوت عليها المجلس الأعلى للنقابة في نوفمبر 2018 ونشرتها الصفحة الرسمية لنقابة بورسعيد الفرعية:
https://www.facebook.com/portsaid.engineering.syndicate/photos/a.293989160623991/2023022157720674/?type=3&theater

ملاحظة على جنب:
رئيس نقابة بورسعيد الفرعية (أستاذ جامعي) دعا رؤساء النقابات الفرعية لإفطار رمضاني يوم الإثنين 27 مايو فإذا بنقيب المهندسين معالي الوزير هاني ضاحي يقرر دعوة المجلس الأعلى للنقابة (اللي رؤساء النقابات الفرعية أعضاء فيه) للاجتماع والإفطار في نفس اليوم في مقر النقابة برمسيس!



الكارثة الثانية (دي جريمة بقى مش كارثة):
حرمان نصف المهندسين من المعاش بحجة عدم اشتغالهم بعمل هندسي
(أو يدفعوا 3 أضعاف المشتغلين سنويا عشان يقبضوا معاش بعد سن الستين!)

المواد 9 و 82 و 83 و 84 تقسم المهندسين إلى:

1- مهندسين معتمدين مشتغلين بعمل هندسي (جدول القيد العام) مطلوب منهم تجديد شهادة ممارسة مهنة سنويا برسوم لا حد أقصى لها لغير العاملين بالحكومة (متوسط 2500جنيه لحديث التخرج و12ألف جنيه للي خبرته 15 سنة) ده غير اختبارات سنوية لخريجي خاص وحكومي على السواء وبرضه رسومها بلا حد أقصى

أو

2- مهندسين غير مشتغلين بعمل هندسي محرومين من حق الترشح في انتخابات النقابة (المادة10) والأخطر محرومين من الحصول على معاش على طريقة نقابة المحامين

وده فيديو من مجلس النواب لعضو المجلس (نقيب مهندسي الجيزة) من قناته على يوتيوب أثناء مناقشة قانون نقابة المهندسين وبيتكلم صراحة عن تقسيمنا إلى مهندسين معتمدين ومهندسين مقيدين (لأن كما شرحنا كونك مقيد لا يعني حقك في معاش):

 

لاحظ اقتصار سجلات المهندسين في المادة 9 فقط على المهندسين المشتغلين بعمل هندسي وتأكيد ده في المادة 7

 وطبعا عشان ده قانون جباية مش أكتر، فالنقابة كانت حريصة على فتح الباب أمام غير المشتغلين الراغبين في البقاء في جدول المشتغلين كي يكون من حقهم صرف معاش النقابة - بس يا ترى ايه الثمن مقابل فتح الباب ده؟
ركّزوا أدناه في المادتين 83 و 84 وقارنوهما بالمادة 98

قانون الجباية واضح زي الشمس:
سيادتك لا تمارس عمل هندسي بس حابب تنتقل لجدول القيد العام (أي جدول المشتغلين) عشان تقبض معاش لما توصل سن الستين؟
النقابة بتقول لك عينيا الاتنين انت مش عارف إنك نور عينينا وللا ايه
بس ادفع!

طبعا المهندس ح يسأل النقابة: طب أدفع كام؟
فالإجابة في المادة 84 هي سداد ثلاثة أضعاف رسوم تجديد شهادة ممارسة المهنة

طبعا المهندس ح يطير من الفرحة لأنه افتكر إن فيه مادة رقمها 98 عن موارد النقابة بتقول إن الرسوم دي لا تتجاوز ألف جنيه

يعني ح يدفع 3آلاف جنيه كل سنة وفوقيهم ألف جنيه تجديد اشتراك ومتوسط 500ج عشان مفيش صحة ينزل انتخابات يبقى كده ح يدفع في السنة 4500 جنيه

بس طبعا في المشمش إنه يدفع 4500 جنيه احنا ح نهزر!
ده قانون جباية يا باشمهندسين مش قانون عادي
ليه؟
لأن المادة 84 قالت ثلاثة أضعاف رسوم تجديد شهادة ممارسة المهنة
وليس ثلاثة أضعاف رسوم استخراج شهادة ممارسة المهنة اللي سقفها ألف جنيه
التجديد حاجة والاستخراج ده حاجة تانية بعد التجديد
أما نقابة استخراج صحيح أنا مش عارف ليه شامم ريحة وحشة في القانون ده :)

طبعا فيه مهندس لمض دلوقتي ح يسأل:
تطلع كام رسوم تجديد شهادة ممارسة المهنة دي؟
 
والإجابة للمرة المليون يا باشمهندس:
ركّز معانا وحياتك نبوس ايدك
ده اسمه قانون جباية مش قانون نقابة
يعني مفيش حد أقصى لرسوم تجديد شهادة ممارسة المهنة!

أيوة سيادتك قرأت الكلام صح!
مفيش حد أقصى وكله بالقانون :)

تجديد شهادة ممارسة المهنة ده بيتطلب إثبات ممارسة المهنة
وده محتاج ورق مصدره صاحب العمل
بعد ما المهندس يتذلل له شويتين حلوين
يقدر ياخد منه الورق عشان يروح بيه النقابة يجدد

أصل بعيد عنك وعن السامعين
تجديدها إجباري كل سنة ويحظر عمل المهندس بدونها

يرجى الضغط على الصورة لتكبيرها

المهم نرجع للموضوع
سيادتك ح تقدم الورق للنقابة
فيه بقى لجنة شفوي صغنططة شقية كده
شغلتها تشوف الورق ده وتناقشك فيه
وطبعا من حقها تقول لك إنها مش كفاية لإثبات ممارستك للمهنة
وفي الحالة من حقها تجبرك على دورة تدريبية رسومها بلا حد أقصى :)
أومال احنا بنهزر ح نشفط جيبك يعني ح نشفط جيبك :)

طب السيسي بيشفط جيوبنا لمصلحة الغلابة يعالجهم ويسترهم:

يرجى الضغط على الصورة لتكبيرها

بل السيسي شفط نفسه لصالح مصر لما اتبرع بنص ممتلكاته وراتبه وميراثه  2014
https://www.youtube.com/watch?v=X0XfcCN9mx8

 


إنما نقيب المهندسين هاني ضاحي عمل لنا ايه عشان يشفطنا كده؟!
ده بيروحها مرة واحدة في الأسبوع ومحدش بيرد ع التلفونات ولا الايميلات!

ما علينا نرجع لقانون جباية نقابة المهندسين الكارثي الجديد في مجلس النواب
اللجنة الشفوي من حقها تجبرنا على دورة تدريبية
رسومها بلا حد أقصى
وبعد اجتياز الدورة يتم تجديد شهادة ممارسة المهنة
وخلال الفترة ما بين قرار اللجنة واجتياز الدورة بيمنح المهندس تصريح مؤقت
من الآخر
النقابة هي الكفيل بتاع المهندس جوة مصر :)
يعني الخليج لغوا نظام الكفالة بس مع نقابة المهندسين مش ح تقدر تغمض عينيك

طبعا حضرتك لو مهندس ع المعاش زمانك بتطلب حد يقيس لك الضغط
مهو إذا كنت أنا دفعة 2006 ومش طايق اللي النقابة بتعمله فينا
كان الله في عون الجميع واعملوا شير عشان صوتنا يوصل

لأن الوحيد في نقابة المهندسين اللي أعلن رفضه لقانون الجباية الجديد هو المهندس محمد إبراهيم العالم عضو مجلس نقابة المهندسين الفرعية بالدقهلية:


وللي ح يسأل: الدورات الإجبارية دي ح تتعمل فين؟ الإجابة:
القانون الجديد فيه باب كامل (الباب الرابع) اسمه مؤسسة العلوم الهندسية
وهي أكاديمية كورسات بفروع في كل المحافظات ولها مجلس إدارة
من الآخر كده سبوبة ح تشفط أي زيادة في إيرادات النقابة من الدمغة وغيره

وبإمكان حضراتكم تحميل قانون جباية النقابة الكارثي الجديد بختم مجلس النواب من موقع مصراوي هنا:

https://www.masrawy.com/news/news_egypt/details/2019/3/6/1527063/-ي-ناقش-الأحد-المقبل-ننشر-نص-مشروع-القانون-الجديد-لنقابة-المهندسين


ملاحظة مهمة و سريعة و سرية بيني وبينك:
جرب ابعت الكلام اللي فوق ده لأي عضو مجلس نقابة منتخب حاليا ح يحلف لك ع المصحف إن القانون الجديد مش بيحرم حد من المعاش والرد عليه كالتالي:

عضو المجلس كلامه صح 100% على فكرة بس كمان غلط 100% لسببين اثنين ملهمش تالت:

السبب الأولاني:
المادة81 بتاعت حق الجمع بين معاش النقابة وأي معاش آخر محذوفة
نظريا مفيش حرمان من المعاش
عايز تقبض معاش النقابة؟
 اتفضل :) بس طبعا انسى معاش وظيفتك :)

السبب التاني وده الأخطر
قانون جباية النقابة الكارثي الجديد مقسم المهندسين نوعين:

- مقيدين غير مشتغلين بعمل هندسي محرومين من حق الترشح في الانتخابات
- معتمدين (أي مقيدين مشتغلين بعمل هندسي) لهم حق الترشح
.
لغاية هنا مفيش أي مساس بالمعاش ولــــكـــنْ:
المادة 84 بتقول "يجوز لمن نقل اسمه إلى جدول غير المشتغلين أن يطلب إعادة قيده بجدول القيد العام بالنقابة [المشتغلين] شريطة سداد ثلاثة أضعاف رسوم تجديد شهادة ممارسة المهنة".
وده فيديو من تحت القبة جوة مجلس النواب للي عايز يتأكد:
https://www.youtube.com/watch?v=UAsFNHDgqCA
.
والسؤال المنطقي :)
يا ترى يا هل ترى ايه السبب اللي ممكن يضطر مهندس إنه ينقل نفسه من جدول غير المشتغلين للمشتغلين لدرجة إنه ح يدفع 3 أضعاف رسوم تجديد شهادة ممارسة المهنة (اللي كمان ملهاش حد أقصى في القانون الجديد)؟؟!!

الإجابة المنطقية:
عشان يقبض معاش وميحصلش فيه زي المحامي غير المشتغل اللي ملوش حق في المعاش :)

طبعا فيه واحد لمض دلوقتي ح يسأل:
طب ليه متأكد المادة 84 سببها الوحيد تمكين غير المشتغل من قبض معاش بعد سن الستين رغم إن القانون مش قايل كده؟

الإجابة:
أولا لأن القانون مفيهوش سبب واحد لتقسيم المهندسين إلى مشتغلين وغير مشتغلين إلا المعاش

ثانيا أي قانون بيكون معاه حاجة اسمها النظام الداخلي
وده يصدره الوزير المختص (وزير الري حاليا أو وزير الإسكان في القانون الجديد)
النظام الداخلي ده بيكون حاجة مقشرة كده لوز اللوز وعنب العنب على رأي عمرو أديب :)

اللي هوا كل البلاوي وكل الكوارث بتكون محطوطة فيه ولا مين شاف ولا مين دري وعشان كده تلاقي القانون فيه حاجات كتير طبقا للنظام الداخلي

ليه؟
عشان يمرروا القانون من غير شوشرة
وبعد كده النظام الداخلي أمره سهل

مثال واحد:
النظام الداخلي الحالي للنقابة فيه مادة مش موجودة في صلاحيات رئيس الجمهورية حتى وهي المادة 136 :)
"يكون الصرف من أموال النقابة بقرار من مجلس النقابة أيا كان المبلغ المنصرف"

وقد نشرت مسودة القانون على الصفحة الرسمية لنقابة بورسعيد الفرعية (لاحظوا يا باشمهندسين الفرق بين القانون والمسودة وهو إحالة المواد المثيرة لغضبنا إلى النظام الداخلي بحيث لا تكون ظاهرة للرأي العام في نصوص القانون نفسه):https://www.facebook.com/portsaid.engineering.syndicate/photos/a.293989160623991/2023022157720674/?type=3&theater

لو عضو المجلس قال لك احنا كلامنا كذب ومش صحيح ابعت له الآتي:


في 12 مارس 2019 أعلنت الصفحة الرسمية لنقابة المهندسين على لسان عضو هيئة المكتب وأمين الصندوق أنها ستقدم مشروع القانون الجديد إلى مجلس النواب خلال أسبوعين:
https://www.facebook.com/eea.org.eg/posts/2398681356822217 

وفي اليوم الثاني مباشرة بعد هذين الأسبوعين أي في السابع والعشرين من مارس 2019 نشرت صحيفة روز اليوسف الحكومية خبر اعتماد وزير الإسكان لهذا القانون قبيل إحالته لمجلسي الوزراء ثم النواب:
http://www.rosaelyoussef.com/news/details/434274

 يمكن تحميل مشروع قانون د.شيرين فراج بختم مجلس النواب هنا: https://drive.google.com/file/d/1HZ5XT9y-TiBosmotdf59JqTCGe6yn9bO/

 وهنا من موقع مصراوي:
https://www.masrawy.com/news/news_egypt/details/2019/3/6/1527063/-ي-ناقش-الأحد-المقبل-ننشر-نص-مشروع-القانون-الجديد-لنقابة-المهندسين

 وقد نشرت مسودته الصفحة الرسمية لنقابة بورسعيد الفرعية (لاحظوا يا باشمهندسين الفرق بين القانون والمسودة هو إحالة المواد المثيرة لغضبنا إلى النظام الداخلي بحيث لا تكون ظاهرة للرأي العام في نصوص القانون نفسه):
https://www.facebook.com/portsaid.engineering.syndicate/photos/a.293989160623991/2023022157720674/?type=3&theater


ولو رد عليك إن قانون د.شيرين فراج (اللي نشره موقع مصراوي هنا بختم مجلس النواب) رفضته الجمعية العمومية لنقابة المهندسين في 6 مارس 2019 ثم رفضته في الأسبوع التالي مباشرة لجنة الإسكان في مجلس النواب - في الحالة دي ابعت له الآتي:
الرد على إشاعة أن مشروع لقانون د.شيرين فراج رفضته الجمعية العمومية في 6 مارس 2019:
اللي حصل إن أحد السادة أعضاء مجلس النواب من المهندسين (د.م. محمد عبد الغني) طلع على منصة مسرح النقابة يوميها وقال أنا برفض القانون وناس سقفت وشكرا على كده لا حصل تصويت ولا حاجة

وحتى لو افترضنا نظريا حصول تصويت بالرفض فهو غير ملزم لا قانونا (قانون نقابة المهندسين الحالي لا يلزم النقيب أساسا بعرض القانون علينا أو حتى على المجلس الأعلى) ولا دستورا لأن مجلس النواب سلطة تشريعية مستقلة أساسا وبالتالي لن يوقف هذا الرفض المزعوم في الجمعية العمومية تمرير القانون في مجلس النواب


الرد على إشاعة أن مجلس النواب رفض مناقشة مشروع الدكتورة شيرين فرّاج:
 
لجنة الإسكان في مجلس النواب صحيح رفضت مناقشة المشروع في العاشر من مارس (بحضور السيد النائب د.م.محمد عبد الغني وزميله النائب وعضو مجلس النقابة م.إيهاب منصور نقيب الجيزة) لكن اللجنة قررت في اليوم التالي الحادي عشر من مارس مناقشة قانون د.شيرين فرّاج ولـــكـــن بعد ورود رؤية ومقترحات نقابة المهندسين بحيث يكون القانونين قدام اللجنة سوا:
https://www.mobtada.com/details/821916

أي أن الجواب النهائي -على رأي جورج قرداحي :) - هو  أن اللجنة لم ترفض مناقشة مشروع قانون د.شيرين فرّاج فليه يا ترى يا هل ترى بعض أعضاء مجلس نقابة المهندسين (وفيهم أعضاء مجلس نواب بالمناسبة) مهتمين يروّجوا لنصف الحقيقة الملغي دون النصف الآخر الساري لمصلحة مافيا المقاولات اللي ورا القانون ؟!!

ولو لسة عضو مجلس النقابة إياه عامل من بنها ابعت له الفيديو ده لمناقشة قانون النقابة تحت قبة مجلس النواب:


طبعا آخر كارت معاه ح يقول لك قانون د.شيرين فراج مفيهوش لا جدول غير مشتغلين ولا دياولو وإن موقع وصفحة ثورة يسقط قانون نقابة المهندسين بيخرفوا

لو وصل معاك للمرحلة دي من اللوع وشغل التلات ورقات واللف والدوران يبقى ارزع في وشه الكلمتين دول:
"
المادة 10 من قانون د.شيرين فراج بختم مجلس النواب تشترط للترشح في انتخابات النقابة أن يكون مقيدا بجدول القيد العام بالنقابة

والمادة 60 تتحدث عن سجلات النقابة وتجديد شهادة المهنة وفق النظام الداخلي للنقابة

أي أن نقابة المهندسين بعد رفضهم للمسودة التي سرّبتها صفحتنا (أكثر من ألف شير) ثم نشرتها بعد بضعة أيام الصفحة الرسمية لنقابة بورسعيد الفرعية - بعد هذا الرفض والاستنكار لجأ هاني ضاحي و نقابة المهندسين إلى حيلة ذكية:

الخطة هي نقل المواد المثيرة للغضب إلى النظام الداخلي للنقابة بحيث تكون مواد القانون هادئة لا تثير الشكوك أو القلق لتسهيل تمرير القانون دون ضجة ووسط المواد يتم إضافة جملة بسيطة "وفقا للنظام الداخلي للنقابة"

بس على مين احنا المهندسين :)


بالمناسبة: نحن نرجّح أن قانون د.شيرين فراج هو نفسه القانون اللي النقابة عايزاه لأنه شبه مطابق للقانون اللي صوت عليه المجلس الأعلى للنقابة في نوفمبر 2018


طبعا كده عضو مجلس النقابة مش ح يلاقي حاجة يقولها غير ادعاء إن موقع و صفحة ثورة يسقط قانون نقابة المهندسين محدش يعرف مين وراهم وشكلهم إخوان عايز ثورة في البلد وحتى من الاسم باين عايزين ايه!

ساعتها ابعت له اللنك ده:
https://www.facebook.com/EngineersEgypt/photos/a.128909374504493/291938498201579/?type=3&theater 
أو الكلام اللي تحت وأوعدك مش ح تشوف وشه تاني :)

ده اسمي ورسالتي في المصري اليوم 9 أغسطس 2018
https://www.almasryalyoum.com/news/details/1313894
.
السيد أ.محمد أمين هو رئيس مجلس أمناء المصري اليوم اللي الصفحة اتسمت ع الاسم اللي اختاره للرسالة اللي مش بس تفاعل معها الرأي العام معها وإنما رد عليها معالي النقيب شخصيا :) وهنا التفاعل تحت عنوان "حاجة تكسف":
https://www.almasryalyoum.com/news/details/1314351
.
ثم هنا تعليق معالي النقيب عليها في مقالين متتاليين - معقولة بيرد على ناس مجهولين للدرجة دي :)
https://www.almasryalyoum.com/news/details/1315482
.
https://www.almasryalyoum.com/news/details/1315764
.
ودي رسالة أخرى عن النقابة نشرها في سبتمبر 2018 الدكتور عمرو الشوبكي بها اسمي الرباعي وسنة التخرج:
https://www.almasryalyoum.com/news/details/1318270
.
وهنا رد السيد أمين الصندوق في النقابة عليها:
https://www.almasryalyoum.com/news/details/1321343
.
وهنا مقال باسمي نشر في العدد المطبوع من صحيفة الشروق اليومية في السادس من فبراير 2010
http://www.shorouknews.com/_Handlers/PDFHandler.ashx?dateForDownloadCount=02-06-2010&path=cabc11b5bcd14febb9eb00e3e4c8bdf54.pdf



وأما خرافة إننا صفحة إخوان فالرد عليها مش بس إني مهندس منوفي :) دفعة 2006 و قايل اسمي ورؤيتي المتواضعة للنقابة منذ أول فيديو على الصفحة هنا:
https://www.facebook.com/EngineersEgypt/videos/129575077771256/

وإنما الرد عليها يتخلص في الحقائق التالية:

- دعونا المهندسين لانتخاب الرئيس السيسي لفترة رئاسية ثانية في مارس 2018:
https://www.facebook.com/EngineersEgypt/videos/130435127685251

- أيدنا التعديلات الدستورية:
https://www.facebook.com/EngineersEgypt/videos/376004969882042/


- نشرنا نصوصا مقترحة لقانون النقابة الجديد وأطلقنا عليها اسم مسودة السيسي رئيسي بعد 2022 :)
https://www.facebook.com/EngineersEgypt/photos/a.128909374504493/227970314598398/?type=3&theater
 

- عرينا جماعة الإخوان الإرهابية وفتواهم على موقعهم الرسمي في 28مايو2015 بقتل كل موظف حكومة ولو جوة المسجد بيصلي الجمعة :(
https://www.facebook.com/EngineersEgypt/photos/a.128909374504493/267020837360012

من فضلكم شيروا الصفحة دي عشان المهندسين يفوقوا ونلحق الكارثة اللي النقابة بتطبخها لنا جوة مجلس النواب قبل التصويت عليها بعد العيد مباشرة :(
وهنا باقي كوارث قانون الجباية ع الشباب و الكل زي اشتراط موافقة "جهات معنية في الدولة" قبل إجراء انتخابات النقابة!